Ուզում են մեզ մուրացկան դարձնել, ի՞նչ անենք. «Գուդվինի» տնօրեն (տեսանյութ)
Մարդիկ եկել են աշխատատեղ խնդրելու, մուրացկանություն չեն անում, չեն ուզում նստել պետության վզին ու դառնալ նպաստառու, ընդամենը պահանջում են օբյեկտիվ մոտեցում: Այս մասին այսօր՝ մայիսի 29-ին, Բաղրամյան պողոտայում բողոքի ակցիայի ժամանակ, News.am-ի հետ զրույցում ասաց «Գուդվին-ԲԵՏ» ՍՊԸ-ի տնօրեն Սարգիս Միքայելյանը:
ՍՊԸ-ի տնօրենն ասաց, որ իրենք պատրաստ են գազալցակայաններից հանել խաղերի էլեկտրոնային սարքավորումները, բայց իրենք պահանջը օբյեկտիվ մոտեցումն է. «Բայց եկեք և տեսեք, որ մայիսի 23-ին, Ալեն Սիմոնյանի նախագիծը ստանում է մի դրական եզրակացություն, որը աբսուրդ է: Հստակ խախտվում է լիցենզավորման մասին օրենքը այն դրույթով, երբ տնտեսական հարցերի հանձնաժողովում հնչեցվում է, թե էլեկտրոնային սարքավորումներով կազմակերպվող վիճակախաղերը օրենքի ընդունումից տասնօրյա ժամկետում պետք է կասեցվեն. դա կոպիտ խախտում է: Մեր պահանջն է՝ առաջին հերթին չխախտել օրենքը, երկրորդ, ստեղծել հնարավորություն, որ յուրաքանչյուր ընկերություն իր ունեցած արտադրանքով կարողանա աշխատել 1,5 տարի, և հետագայի համար ճանապարհ հարթել, խոստանալ ժողովրդին, որ կստեղծվեն նոր աշխատատեղեր, կլինեն ներդրումներ այլ ֆորմատով կամ ուրիշ ոլորտներում»,- ասաց Միքայելյանը:
Նա հավելեց, որ եթե փակում են խաղատները, ապա թող բոլորը փակեն. «Բերում ենք մի ականջահաճո նախագիծ, որը սպասարկում է մեկ ընկերության շահը: Ժողովրդին ստիպում են, որ գնան արտերկիր գողություն անեն կամ մնան երկրում ու դառնան նպաստառու. էտպես հարց չեն լուծում»,- ասաց տնօրենն ու ավելացրեց, որ նախագծի հեղինակ Ալեն Սիմոնյանի հետ որևիցե քննարկում չեն ուզում ունենալ:
«Մենք գրություն ենք ուղարկել ՀՀ վարչապետին, բայց նա դեռ չի նայել այդ խնդիրը: Կարծում ենք, որ դա միայն ժամանակի խնդիր է: Մենք Արարատ Միրզոյանին ուզում ենք լուծումներ առաջարկել, որոնք քննարկված և որոշված են մեր կողմից: Այդ լուծումները կկարգավորի և խաղամոլությունը, և մարդկանց հնարավորություն կտա անցնցում տեղափոխվել այլ գործունեության»,- ասաց ՍՊԸ-ի տնօրենը:
Նշենք, որ այսօր՝ մայիսի 29-ի առավոտից բուքմեյքերական ընկերությունների աշխատակիցները Հայաստանի ԱԺ դիմաց բողոքի ակցիա են իրականացնում ընդդեմ բուքմեյքերական գրասենյակների գործունեությունը սահմանափակով օրինագծի: Ցուցարարները փակել են Բաղրամյան պողոտան և պահանջում են հանդիպում ԱԺ նախագահ Արարատ Միրզոյանի հետ:
ԱԺ տնտեսական հանձնաժողովը հավանություն է տվել վիճակախաղերի կազմակերպման պայմանները խստացնելու մասին նախագծին, որը մշակվել է խաղամոլության դեմ պայքարի շրջանակում։ Նախագծով առաջարկվում է Երևան քաղաքից հեռացնել բոլոր բուքմեյքերական գրասենյակները։ Նախագիծն ընդունելու պարագայում այն ուժի մեջ կմտնի 2020 թ․-ի նոյեմբերից:
Նախագծի համահեղինակներն են պատգամավոր Նաիրա Զոհրաբյանը («Բարգավաճ Հայաստան» խմբակցություն), ԱԺ փոխխոսնակ Ալեն Սիմոնյանը և պատգամավոր Սիփան Փաշինյանը («Իմ քայլը խմբակցություն»)։ Հեղինակների կարծիքով` օրինագծում փոփոխությունների ընդունումը կարևոր քայլ է խաղամոլության դեմ պայքարի գործում։