Պատմության անիվի հերթական շրջապտույտը. ՀՅԴ-ն կրկին հայտնվեց ընդգծված ընդդիմության շարքերում. «Առավոտ»
«Առավոտ» թերթը գրում է.
«Պատմությունը, ինչպես հայտնի է, պարուրաձև է, իրադարձությունները ժամանակ առ ժամանակ կրկնվում են՝ իհարկե, ոչ ճշգրտորեն, այլ փոփոխված տարբերակներով: Առաջին նախագահի օրոք Դաշնակցությունն արմատական ընդդիմություն էր՝ դրանից բխող բոլոր հետևանքներով, այնուհետև կուսակցությունը սկսեց համագործակցել երկրորդ և երրորդ նախագահների հետ՝ ժամանակ առ ժամանակ հակադրվելով նրանց: Հիմա պատմության անիվը ևս մի շրջապտույտ է կատարել, և ՀՅԴ-ն կրկին հայտնվեց ընդգծված ընդդիմության շարքերում: Թեև իշխանությունն այդ հարցում «պաշտոնապես» ոչինչ չի հայտարարում, Դաշնակցության վերջերս կազմակերպած հանրահավաքը իշխանական շրջանակների կողմից նյարդային է ընդունվել: Եթե տեսնում եք Ազատության հրապարակում տեղի ունեցած հանրահավաքի նկարը՝ «թոչնի բարձրությունից», որը կոչված է ապացուցելու հանրահավաքի սակավությունը (առաջ նման նկարներ էր հրապարակում ՀՀԿ-ն), ուրեմն իմացեք՝ իշխանությունը դժգոհ է:
Դաշնակցության գաղափարախոսությունն ինձ համար խորապես խորթ է: Բայց երբ որևէ դաշնակցական գործիչ որևէ հարցով կարծիք է արտահայտում, իսկ իշխանության ֆանատները դրան հակադարձում են, թե «դու ընդհանրապես իրավունք չունես խոսելու, որովհետև ձեր կուսակցությունը ծախվել էր Քոչարյանին ու Սերժին», դա ինձ համար փաստարկ չէ: Կարծիքների երփներանգը, որ պետք է լինի հնարավորինս բազմազան, որքան հարուստ, այնքան լավ պետության համար: Ոչ ոք ոչ մեկի բերանը չպիտի փորձի փակել: Մանավանդ Դաշնակցության պարագայում, անկախ մեր անձնական վերաբերմունքից, դա մեր համազգային կառույցներից մեկն է:
Այսօր մայիսի 28-ն է: Խորհրդային Հայաստանում չէին ընդունում այս տոնը, որովհետև կոմունիստները կարծում էին, որ մենք՝ հայերս, չենք կարող անկախ պետություն ունենալ, և նման ձգտումները մեզ միայն վնաս կբերեն: Այդ տարիներին քարոզչությունն ուղղվում էր Առաջին Հանրապետության դեմ, իսկ պատմությունն ակնհայտորեն խեղված էր ներկայացվում: Երրորդ Հանրապետության հիմնադիրները վերականգնեցին 1918- 20 թվականների պետական զինանշանը և օրհներգը, և դա գեղեցիկ քայլ էր, «կամար էր գցում» 1918 և 1991 թվականների միջև»:
Նյութն ամբողջությամբ կարդացեք թերթի այսօրվա համարում: