«Սպայկան» ոչ մի բոյկոտ էլ չի անում, բնականոն հունով աշխատում է. Բոյկոտի մասին հայտարարությունը քաղաքական բնույթ էր կրում (տեսսանյութ)

«Ես ողջունում եմ կառավարության կողմից հռչակված տնտեսական հեղափոխությունը։ Որպես գործարար՝ կարող եմ ասել, որ բավականին դժվարություններ, որոնք մենք նախկինում ունենում էինք հարկային, մաքսային մարմինների հետ, այսօր վերացել են։ Մենք շատ հանգիստ կերպով ենք աշխատում։ Գրեթե խոչընդոտներ չկան»,- «Առաջին լրատվական»-ի հետ զրույցում ասաց Հայաստանի արտահանողների միության նախագահ Րաֆֆի Մխչյանը։

Նրա խոսքով՝ առհասարակ հեշտացել է գործարար միջավայրի աշխատանքը, շփումները պետական մարմինների հետ։ «Ես կարծում եմ, որ միայն կառավարության քայլերը բավարար չեն կարող լինել։ Ժողովուրդը, գործարարը պետք է կարողանան որոշակի հավելյալ քայլեր անել։ Մշակույթը պետք է զարգանա մեզանում՝ հարգել օրենքը, հարկ վճարել, որը ինքնին կհանգեցնի հեղափոխության»,- ասաց Մխչյանը՝ հավելելով, որ այսօր ներքաղաքական զարգացումները, սոցցանցերում առկա բացասական մթնոլորտը շատ են ազդում տնտեսության զարգացման վրա։

Րաֆֆի Մխչյանն ասաց, որ այսօր Հայաստանը, հայ տնտեսվարողները բավական լուրջ հաջողություններ ունեն եվրոպական շուկայում, ամերիկյան շուկայում, և պետք է զինվել համբերությամբ միջազգային հարթակներում շուկա գտնելու համար։

Մխչյանը մեզ հետ զրույցում անդրադարձավ նաև Լարսի խնդրին, նշեց, որ կառավարությունը ամեն ինչ պետք է անի Լարսին այլընտրանք գտնելու համար, բայց ազնիվ լինելու համար պետք է նկատել, որ այդ հարցը միայն Հայաստանի կառավարությունից չի կախված։ «Այդ հարցը շատ-շատ կարևոր է մեր տնտեսության համար։ Շուտով գյուղատնտեսական սեզոնը, մթերումների սեզոնը կսկսվի, և մենք, տնտեսվարողները մշտապես պետք է տուժենք դրա պատճառով։ Եթե պատկան մարմինները կարող են այսօր ավելի էֆեկտիվությամբ այս հարցին լուծում տալ, ապա պետք է դա անել»։

Անդրադառնալով «Սպայկա» ընկերության բոյկոտին՝ Մխչյանը նշեց, որ, որքանով ինքն է հասկանում, «Սպայկան» ոչ մի բոյկոտ էլ չի անում, իր բնականոն հունով աշխատում է: «Մի քանի օր առաջ իմ տարածքում «Սպայկա»-ի մեքենան ԵԱՏՄ տարածքից բերված բեռ էր դատարկում։ Ես «Սպայկա»-ի կողմից բոյկոտ չեմ տեսնում։ Մարդիկ առաջվա պես աշխատում են։ Իսկ բոյկոտի մասին հայտարարությունը քաղաքական բնույթ էր կրում»,- նշեց Մխչյանը։

Առավել մանրամասն՝ տեսանյութում: