«Ասաց, որ շատ նման եմ Թիմաթիին և առաջարկեց նկարահանվել տեսահոլովակում». Հայկ Շաբանյան՝ Թիմաթիի հայ «դուբլյորը» (տեսանյութ և լուսանկարներ)
Օրերս Թիմաթին և Նազիման ներկայացրին Հայաստանում նկարահանված իրենց նոր տեսահոլովակը, որի ռեժիսոորը Պավել Խուդյակովն է, կնոջ՝ Կորնելյա Պոլյակի հետ: Այն նկարահանվել է «Нельзя» երգի հիման վրա: Տեսահոլովակի նկարահանումները տեղի են ունեցել, ինչպես Երևանում, այնպես էլ Սևանում: Այնտեղ կտեսնեք նաև հայ դերասաններից շատերին, այդ թվում՝ Լևոն Հարությունյանին, Արտաշես Մխիթարյանին, Գևորգ Գրիգորյանին, իսկ որոշ տեսարաններում Թիմաթիին փոխարինել է հայտնի մոդել և բլոգեր Հայկ Շաբանյանը, որը Հայաստանում շատերին հայտնի է հենց ռեփերի հետ տպավորիչ նմանությամբ:
Հայկը News.am Stile-ին պատմել է, թե ինչպես է ստացել տեսահոլովակում նկարահանվելու առաջարկը:
«Նկարահանվելու հրավերը ստացել եմ շատ պատահական՝ Թիմաթիի թիմի տնօրեն Կիրիլ Վալենտինովիչից: Նա մոտեցավ ինձ, երբ ես անցնում էի Թումանյան փողոցով: Ասաց, որ շատ նման եմ Թիմաթիին և առաջարկեց նկարահանվել նրա նոր տեսահոլովակում»,-պատմում է Հայկը, որն անձամբ իր և Թիմաթիի միջև շատ նմանություն չի տեսնում, սակայն այդ նմանությունն, իհարկե, մի շարք զավեշտալի դեպքերի առիթ է դառնում.
«Դեպքերից ամենահետաքրքիրը երևի այն էր, երբ Թիմաթիի առաջին մենահամերգի ժամանակ, որը Մարզահամերգային համալիրում էր, ինձ հետ նկարվեց մոտ 300 երկրպագու՝ մի մասը պարզապես նմանեցրել էին, մի մասն էլ շատ լուրջ մտածել էր, թե Թիմաթին եմ (ծիծաղում է)»:
Հայկը նշում է՝ տեսահոլովակում իրեն կարող եք գտնել «Էրեբունի» բժշկական կենտրոնի և Սևանի տեսարաններում:
«Նկարահանման ընթացքը նման չէր հայկական աշխատելաոճին: Ամեն ինչ այլ կերպ էր արվում, բայց շատ հետաքրքիր էր ու չկրկնվող»,-ասում է նա՝ հավելելով, որ թե ռեժիսորը, թե պրոդյուսերն իրեն շատ հավանել էին, ըստ այդմ՝ հույս ունի, որ, միգուցե, համագործակցության այլ առաջարկներ էլ լինեն:
Անդրադառնալով այն տեսակետին, թե Թիմաթին մեծամիտ է շփման հարցում՝ Հայկը նշեց.
«Նա շատ պրոֆեսիոնալ է, չեմ կարծում, թե գոռոզ է, ուղղակի ստիպված է իրեն այդպես պահում, քանի որ այլ դեպքում նրան պարզապես անդադար կշեղեին գործից: Ամբողջ նկարահանման ընթացքում նա հիմնականում շփվում էր Նազիմայի ու Զաուր Զասեևի հետ»:
Սյունե Առաքելյան
Լուսանկարները տրամադրել է Հայկ Շաբանյանը: