«Ատլանտիս գարդեն» ՍՊԸ-ն ընդդեմ Երևանի քաղաքապետարանի. պահանջում են ոչ իրավաչափ ճանաչել սրճարանի ապամոնտաժումը

«Ատլանտիս գարդեն» ՍՊԸ-ն վարչական դատարան է դիմել՝ ոչ իրավաչափ ճանաչելու Երևանի քաղաքապետարանի մարտի 13-ի գործողությունները։

«Ատլանտիս գարդեն» ՍՊԸ-ի սրճարանը օպերայի հարակից տարածքում քաղաքապետարանի կողմից մարտին ապամոնտաժված սրճարաններից մեկն է։

ՍՊԸ-ի և «Կենտրոն-կանաչապատում» ընկերությունների միջև Մաշտոցի պողոտայի 422.0 քմ մակերեսով հողատարածքը ենթավարձակալության հանձնելու պայմանագիրը կնքվել է դեռեւս 2004թ.-ի նոյեմբերի 30-ին՝ 23 տարի ժամկետով։ Պայմանագրի համաձայն՝ հողատարածքից 280.0 քմ-ն օգտագործվելու էր որպես սպասարկման տարածք, իսկ 142.0 քմ-ն կանաչապատման նպատակով էր օգտագործվելու։ Սակայն փետրվարի 13-ին քաղաքապետարանից գրություն է ստացվել առ այն, որ ընկերության կառուցապատման իրավունքը դադարել է, քանի որ ենթավարձակալության իրավունքով տրամադրված հատվածում առկա են ինքնակամ կառույցներ, կոնստրուկցիաներ եւ առաջարկվել ողջամիտ ժամկետում ապամոնտաժել հողամասի վրա առկա ինքնակամ կառույցները ՝ դրանք հանձնելով գույքի սեփականատեր Երևան համայնքին։ Մարտի 13-ին սկսվել են ապամոնտաժման աշխատանքներ։

Ընկերության իրավաբանն արձանագրում է, որ վարձակալված տարածքում առկա հարթակը, որը ներկայացվել էր որպես ինքնակամ շինություն, իրականում ունի պետական գրանցում, որի վերաբերյալ 03.12.2004թ. տրվել է անշարժ գույքի սեփականության վկայական։

Իսկ եթե անգամ քաղաքապետարանն իրոք մտածում էր, որ այն ինքնակամ շինություն է, ապա նախ պետք է կայացներ կառույցը քանդելու որոշում։ «Երեւանի քաղաքապետը, օժտված լինելով համայնքի ղեկավարի լիազորություններով, նախ պարտավոր էր ինքնակամ կառույցներով զբաղեցված չօրինականացված կառույցը քանդելու մասին որոշում կայացնել, որի առկայության դեպքում կարող էր նաև քանդման թույլտվություն տալ։ Սակայն առանց ինքնակամ կառույցները քանդելու մասին Երեւանի քաղաքապետի որոշման՝ քաղաքապետարանի կողմից կատարվել են քանդման աշխատանքներ»,- «Փաստինֆո»-ին ասաց հայցվորի ներկայացուցիչ Ա.Մկրտչյանը։

Բացի այդ՝ տվյալ պարագայում տրված «ողջամիտ ժամկետ»-ը հակասում է օրենքով սահմանված կարգին։ Ըստ ՀՀ օրենքի 78-րդ, 84-րդ և 86-րդ հոդվածների վերլուծության՝ նախազգուշացումը պետք է կազմվի գրավոր, սահմանված կարգով հանձնվի պարտավոր անձին, տվյալ դեպքում սրճարանի սեփականատիրոջը։ Դրանում պետք է սահմանվի համապատասխան պարտականությունը կատարելու ժամկետը, որի ընթացքում սեփականատերը հնարավորություն ունի դա կատարել իր համար ընդունելի և օրենքով սահմանված եղանակներով։ Փաստաբան Արթուր Մկրտչյանի խոսքով սրճարանն այս հարցում չի նախազգուշացվել, քանի որ որպես այդպիսին որոշում գոյություն չունի։ Նա նաև վստահ է, որ վերոշարադրյալները բավարար են, որպեսզի Երևանի քաղաքապետարանի գործողությունները կապված կառույցների քանդման հետ իրավաչափ չճանաչվեն։

Հայցադիմումը մակագրվել է դատավոր Մհեր Պետրոսյանին։