Իտալիայում անձրեւի պատճառով փչացած հանգստի համար զբոսաշրջիկներին փոխհատուցում կվճարեն
Իտալիայի Տոսկանա մարզում՝ Էլբա կղզում, հյուրերին հյուրանոցային համարի կամ տների համար ծախսերի փոխհատուցում են առաջարկում, եթե հանգստի ժամանակ երկարատեւ անձրեւներ են տեղացել, հաղորդում է «Ռոսիյսկայա գազետա»-ն:
#ElbaNoRain անվանմամբ նախաձեռնությունը պատահական չի ստեղծվել: Այն ստեղծվել է հարցման հիման վրա, որի համաձայն՝ իտալացիների 72%-ը վստահում է եղանակի տեսությանն ու հանգստի վայր է ընտրում՝ «խորհրդակցելով» օդերեւութաբանների հետ: Խնդիրն այն է, որ Էլբայում կանխատեսումները հաճախ չեն իրականանում:
Սխալն ուղղելու համար տեղի իշխանությունները որոշել են փոխհատուցում վճարել: Պայմանը հետեւյալն է. եթե առավոտյան ժամը 10-ից մինչեւ երեկոյան 8-ը պահպանվել են եղանակային անբարենպաստ պայմանները, զբոսաշրջիկները կստանան գիշերակացի համար վճարված գումարը:
Նախաձեռնությունը կգործի մինչ մայիսի վերջ: Սակայն իշխանությունները չեն բացառում, որ այն կերկարաձգվի մինչեւ աշուն:
Օդերեւութաբանների տվյալներով՝ մայիսն ու հունիսն Իտալիային արեւային օրեն չեն շռայլի, եւ այդ նախաձեռնությունը դուր կգա զբոսաշրջիկներին: