Առեղծվածային հիվանդության պատճառով աղջկա աչքերից արյուն է հոսում
Ավստրալուհին պատմել է մի հիվանդության
մասին, որի պատճառն արդեն մի քանի ամիս է՝ բժիշկները չեն կարողանում
պարզել։ Ինչպես հայտնում է 9News-ը, աղջկա աչքերից և բերանից արյուն է
գալիս, ուշագնացություններ են լինում։
Կես տարի առաջ 17-ամյա ավստրալուհի Ալեքսիս Հարիսոնը, որն աշխատում էր
մանկապարտեզում, լոգարանում սայթաքել է և ընկել, որի հետևանքով գլխին
հարված է ստացել։ Հիվանդանոցում նրան հետազոտել են և տուն ուղարկել։
Հաջորդ օրը աղջկա աչքից առաջին անգամ արյուն է եկել, իսկ ավելի ուշ նա
ուշագնաց է եղել։ Ավստրալուհուն տեղափոխել են հիվանդանոց, որտեղ
համակարգչային տոմոգրաֆիա են արել։ Բժիշկները հայտարարել են, որ
գանգուղեղային վնասվածք չկա և մի քանի ժամ անց աղջկան դուրս են գրել։
Հարիսոնի մոր խոսքերով՝ աղջիկը կիսաանգիտակից վիճակում է եղել, բայց բժիշկները պնդել են, որ վտանգավոր ոչինչ չկա։
Երբ արյունահոսություններն ու ուշագնացությունները հաճախակիացել են,
ծնողները պնդել են, որ աղջկան գանգուղեղի մագնիսառեզոնանսային տոմոգրաֆիա
անեն։ Սակայն, հետազոտության արդյունքում գանգուղեղի վնասվածք չի
հայտնաբերվել։ Բժիշկներն ասել են, որ ուշագնացությունների պատճառը
հոգեբանական է։
Ակնաբույժը նույնպես աչքերում վնասվածքներ չի հայտնաբերել, սակայն
հավելել է, որ աչքերը հոգեբանական պատճառներով չեն կարող արյունահոսել։
Աղջկա մոտ այժմ ուշագնացությունները մոտ 3 ժամ են տևում, արյուն է
հոսում երկու աչքից, քթից և բերանից։ Ավստրալուհին չի կարողանում աշխատել,
մեքենա վարել։
Բժիշկները հրաժարվում են Հարիսոնին բուժել՝ պնդելով, որ այդպիսի դեպք առաջին անգամ են հանդիպում։