Գյումրիի վթարային շենքերից մեկում վնասազերծման աշխատանքներ են կատարվել փլուզումը կանխելու համար

Գյումրիի Խրուշչովյան Գորկի 67 շենքի 8 մուտքերի բոլոր` 71 բնակարանները չէ, որ ունեն բնակիչներ: Շատերը հեռացել են շենքի վթարային վիճակի պատճառով:

Շենքի վերջին հարկերում ապրելն արդեն անհնար է, տեղումներից հետո կիսափլված տանիքն ավելի է վնասվել: Տների առաստաղները փայտից են, անձրևներն էլ իրենց գործն արել են ծակ տանիքի պատճառով:

Մասնակի քարաթափումները Գորկի 67-ում սովորական են դարձել: Վերջին օրերի առատ տեղումներից հետո փլուզումների վտանգն ավելի է մեծացել: Բնակիչների ահազանգին այս անգամ արագ արձագանք եղավ: Տանիքի փլուզվող հատվածում «Կենտրոն» համատիրությունը առաջին անգամ վնասազերծման աշխատանքներ կատարեց:

Ապամոնտաժումից հետո համատիրության բրիգադը անցնելու է վթարային շենքի տանիքի վերանորոգմանը, բայց ընդամենը մասնակի: Ամբողջական նորոգման համար բնակիչներից հավաքագրած գումարները քիչ են, տեղական բյուջեից ստացած հատկացումները` նույնպես:

8 մուտք ունեցող շենքի տանիքի համար մեծ գումար է անհրաժեշտ: Այն, ինչ հիմա ի վիճակի են անելու, լինելու է երկրորդական շուկայից գնված շինանյութով, որն էլ որակի ու դիմացկունության առումով երկար կյանք չունի, բայց գոնե վտանգավոր հատվածները կփակեն: Շենքը 2004 թվականին է անցել համատիրության սպասարկմանն արդեն վատ վիճակում, բնակիչներն էլ իրենց հերթին արտաքին միջամտությամբ խարխել են արտաքին տեսքը վթարային տանիքի հաշվին:

Արտաքին տեսքից բացի, տանիքի ներսում կապի օպերատորներն էլ սարքեր տեղադրելու ժամանակ են վնասել ծածկը: Այս շենքի տանիքում հիմնովին նորոգման աշխատանքներ կատարելը նաև շատ բարդ է, մոտ 60 աստիճանի թեքության տանիքում աշխատանքներ կատարելու համար այլ տեխնիկա է հարկավոր:

Շենքի մուտքերից մեկում էլ վերջապես վերանորոգման աշխատանքներ իրականացվեցին: Մյուս մուտքերում էլ նույն խնդիրը կա, պարզապես դեռ մյուսներին հասնելու գումարը չկա: «Կենտրոն» համատիրության սպասարկման տարածքում 100-ից ավելի շենք կա ու մեծ մասը քաղաքի հին բնակֆոնդն է: Դրանք տարբեր աստիճանի վթարայնության շենքերն են, որոնք տանիք չունեն, տներում պատերն են քայքայվում: Մասնակի նորոգումներն էլ այդ շենքերի համար փրկություն չեն։

Համատիրության նախագահը շենքերի գույքագրում էլ է արել, թվերը ներկայացրել է Գյումրիի քաղաքապետարանին, որ խնդիրը նրանց միջոցով հասնի կառավարությանը: