Այլ բան չի մնացել կպնելու, նորից որոշել եք վերադառնալ «Գարդասիլին»

«Հայաստանը շարունակելու է իր քայլերը «Գարդասիլ» պատվաստանյութի ուղղությամբ և շարունակելու է փրկել կյանքեր՝ անկախ դրա դեմ անհիմն մեղադրանքներից, որոնք մինչ օրս որևէ կերպ հիմնավորված չեն եղել»,- մայիսի 13-ին, ամփոփելով իր պաշտոնավարման 1 տարին, ասաց ՀՀ առողջապահության նախարար Արսեն Թորոսյանը՝ անդրադառնալով «Գարդասիլ» պատվաստանյութին:

«Գարդասիլի» մասին հարցը նախարարին դուր չեկավ, նշեց, որ պատասխանում է վերջին անգամ և կոչ արեց ոչ մասնագիտական քննարկման օրակարգից թեման հանել, միևնույն ժամանակ, շատ հասկանալի համարեց թեման ուռճացնելը.

«Այլ բան չի մնացել կպնելու, նորից որոշել եք վերադառնալ էս հարցին և խաղալ մարդկանց նուրբ լարերի հետ»:

Արսեն Թորոսյանը ևս մեկ անգամ հստակեցրեց, որ Հայաստանը որոշել է պայքարել արգանդի վզիկի քաղցկեի դեմ, որից տարեկան 120 կին է մահանում: Միջազգային գործընկերների կողմից ներդրվել է պապիլոմավիրուսի պատվաստանյութ «Գարդասիլ 4-ը» և միջազգային գործընկերների աջակցման շնորհիվ առաջին խմբաքանակը Հայաստանին տրվել է որպես նվեր, իսկ մնացած խմբաքանակները կվաճառվեն 25 անգամ ավելի էժան, քան շուկայական գինն է:

«Ես ինքս օգտագործել եմ այդ պատվաստանյութը: Անցած ամիս մոտավոր 1500 պատվաստման դեպք ենք ունեցել: Ես վստահ եմ, որ մեր հաստատակամ քայլերն իր արդյունքը տալու է, և մայրերը, տարբեր տարիքի աղջիկները հասկանալու են, որ իրենց քաղցկեղից պաշտպանելու համար պատվաստանյութը վճռական է: Նաև այլ ծրագրեր են ներդրվելու, միայն արգանդի վզիկի քաղցկեղով չենք սահմանափակվելու: Մենք շարունակելու ենք փրկել երեխաների, մեծերի կյանքերը, ինչպես փրկում ենք կարմրուկից, պոլիոմելիտից, դիֆտերիայից ու կապույտ հազից»,- եզրափակեց խոսքը նախարարը` ասելով, որ «Գարդասիլին» վերաբերող ոչ մի հարցի այլևս չի պատասխանի: