Դուք եկել եք Հայաստանի ամենամեծ և ջրային պաշարն ամբարող մարզ. Գեղարքունիքի մարզպետ
Գեղարքունիքի մարզում այսօր անցկացվում է «Իմ քայլը հանուն Գեղարքունիքի» ներդրումային համաժողովը: Գեղարքունիքի մարզպետ Գնել Սանոսյանն ընդգծեց՝ այս մարզի կազմավորումից՝ 1996-ից ի վեր առաջին անգամ է նման համաժողով անցկացվում:
«Դուք եկել եք ոչ միայն ՀՀ ամենամեծ մարզ, այլև ՀՀ ամենամեծ ջրային պաշարը ամբարող մարզ, որը տարիների ընթացքում ավելի է մեծացնելու իր դերն ու նշանակությունը: Համոզված եմ, որ դուք այսօր ավելի երջանիկ եք ու ավելի բարձր տրամադրություն ունեք, որովհետև ձեզ դիմավորել է մեր կապուտաչյա գեղեցկուհին՝ Սևանը»,- ասաց նա:
Սանոսյանը տեղեկացրեց, որ համաժողովին 110 գործարար է մասնակցում, ընդգծեց՝ 72 գործարար արտերկրից է: Աշխարհագրությունը մեծ է. համաժողովին մասնակցելու համար Հայաստան են ժամանել գործարարներ ԱՄԷ-ից, Իսպանիայից, Ֆրանսիայից, Դանիայից, Քուվեյթից, Իրանից, Ուկրաինայից և այլ երկրներից:
Մարզպետն ասաց՝ Ռուսաստանից, Ղազախստանից և Ուկրաինայից ժամանած թվով 47 գործարար ծնունդով Գեղարքունիքի մարզից է:
«Տնտեսության բոլոր ճյուղերը չէ, որ մեր մարզում պետք է զարգացնել, առաջնահերթություն ենք տվել գյուղատնտեսությանը, զբոսաշրջությանը և այլընտրանքային էներգետիկայի զարգացմանը»,- ասաց մարզպետը:
Մարզի տուրիստական պոտենցիալը միայն Սևանով չի սպառվում. այստեղ կան բազմաթիվ պատմամշակութային հուշարձաններ: