Բնակարանները Երևանում շարունակում են թանկանալ՝ չնայած գնորդները պակասել են

Ըստ պաշտոնական
տվյալների՝ ընթացիկ տարվա մարտին բնակարանների առուվաճառքի գործարքների
քանակությունը մնացել է գրեթե նույն մակարդակում՝ ի տարբերություն անցած
տարվա սկզբի՝ 1401 գործարք 1400-ի համեմատ: Այդ միտումը նկատվում է ամբողջ
երկրում ընդհանուր առմամբ: Իսկ մայրաքաղաքում նկատվում է անկում՝ 64
գործարքի թվով կամ 6.6 տոկոսով:

Ինչպես հայտնի է, անշարժ գույքի շուկայի վրա ազդող գործոններից մեկը
բնակչության միգրացիան է: Ապրիլի 1-ի դրությամբ Հայաստանի բնակչությունը
նվազել է 7.8 հազար մարդու քանակով կամ 0.3 տոկոսով: Քանի որ այդ
գործընթացը տեղի է ունենում բնակչության բնական աճի ֆոնին, դրա պատճառն
էմիգրացիան է: Նշենք, որ բնակչության թիվն ամենաշատը կրճատվել է Շիրակի
մարզում (2.2 հազար մարդ), Լոռիում (1.9 հազար մարդ) եւ Արագածոտնում (1.7
հազար մարդ):

Այդ
առումով մայրաքաղաքը բացառություն էր: Նշված ժամանահատվածում այստեղ
բնակչության թիվն աճել է 4 հազար մարդու կտրվածքով կամ 0.4 տոկոսով:
Այստեղ, ըստ էության, իր դերն ունի մարզի բնակիչների ավանդական հոսքը դեպի
մայրաքաղաք: Դեռ ավելին, Հայաստան ժամանող բազմաթիվ օտարերկրացիներին
գրավում է հենց Երեւանը:

Սակայն, ըստ պաշտոնական տվյալների, օտարերկրացիները մեծամասամբ վաճառում
են իրենց անշարժ գույքը, ոչ թե ձեռքբերում այն: Մանրամասնենք բնակարանների
տվյալները ընթացիկ տարվա առաջին եռամսյակի կտրվածքով: Այդ
ժամանակահատվածում Հայաստանում օտարերկրյա քաղաքացիները վաճառել են շուրջ
366 բնակարաններ (երկրում բնակարանների ընդհանուր վաճառքի 10.1 տոկոսը):
Իսկ նրանց կողմից ձեռք են բերվել գրեթե երկու անգամ պակաս թվով
բնակարաններ՝ 197 բնակարան (երկրում բնակարանների ընդհանուր գնման 5.4
տոկոսը): Ավելի վաղ ենթադրվում էր, որ օտարերկրացիների մի մասը մեր
հայրենակիցներն են, որոնք փոխել են քաղաքացիությունը:

Մայրաքաղաքում բնակարանների առաջնային շուկայի պահանջարկը խթանվում է
պետական ծրագրերի միջոցով, որոնք տրամադրում են քաղաքացիների հիպոթեքային
արտոնություններ: Որպես կանոն նոր բազմաբնակարան շենքերը ներկայումս
կառուցվում են ոչ մայրաքաղաքի էլիտար կենտրոնում: Այսինքն՝ Հյուսիսային
պողոտայի նման նախագծեր բնակարանների չափազանց բարձր գներով արդեն կարծես
չեն նախատեսվում:

Անցյալ տարի Երեւանում շահագործման էր հանձնվել 63 բնակելի շենք, որոնք
կառուցվել էին կազմակերպությունների հաշվին: Դա բավականին գերազանցել է
նախորդ տարվա ցուցանիշը, երբ շահագործման էր հանձնվել ընդամենը 4 շենք:

Հաշվի առնելով բնակարանների մեծ առաջարկը (ինչպես առաջնային, այնպես էլ
երկրորդային շուկայում), գնորդներն ընտրելու խնդիրներ չունեն: Սպառման
խնդիրներ ունեն միայն անշարժ գույք վաճառող անձինք: Այդ պայմաններում
հակասական են պաշտոնական տվյալները, որոնք վկայում են մայրաքաղաքում
բնակարանների շուկայական գների անդադար աճի մասին: Այդ առումով առանձնանում
է Կենտրոն վարչական շրջանը, որտեղ 1ք/մ մակերեսը տարվա ընթացքում թանկացել
է 17 տոկոսով:

Ներքոնշյալ աղյուսակում ներկայացված է գների դինամիկան դոլարով
բնակարանի 1 ք/մ մակերեսի համար: Նշենք, որ ընթացիկ տարվա հունվար-մարտ
ամիսներին ԱՄՆ-ի դոլարի փոխարժեքը աննշան կրել է փոփոխություն: