Լևոն Տեր-Պետրոսյանին Արցախի մայիսի 9-ի եռատոնի միջոցառումներին չեն հրավիրել

ՀՀ առաջին նախագահ Լեւոն Տեր-Պետրոսյանը Արցախում մայիսի 9-ի եռատոնի միջոցառումներին մասնակցելու հրավեր չի ստացել։

Armdaily.am –ի հետ զրույցում ասաց ՀԱԿ մամուլի խոսնակ Արման Մուսինյանը՝ հավելելով, որ նախագահը որևէ միջոցառման մասնակցության հրավեր չի ստացել նաև Հայաստանից: Խոսնակը հրաժարվեց մեկնաբանել Արցախի նախագահ Բակո Սահակյանի և երկրորդ նախագահ Արկադի Ղուկասյանի դիմումը Հայաստանի գլխավոր դատախազ Արթուր Դավթյանին, որով նրանք խնդրել էին մայիսի 9-ին ընդառաջ փոխել Ռոբերտ Քոչարյանի խափանման միջոցը, որպեսզի վերջինս կարողանա մասնակցել Շուշիում և Ստեփանակերտում անցկացվելիք եռատոնի միջոցառումներին։

«Չենք մեկնաբանում, նախագահը հրավեր չի ստացել, այդքանը միայն»,-ասաց նա։ Հիշեցնենք, որ դատախասությունը մերժել էր նախագահների այդ դիմում-խնդրանքը՝ պատճառաբանելով, որ քրեական գործը գտնվում է Երեւանի ընդհանուր իրավասության դատարանում, ՀՀ դատախազությունը տվյալ քրեական գործով վարույթն իրականացնող մարմինը չէ, հետևաբար նախագահների կողմից ՀՀ գլխավոր դատախազին հասցեագրված դիմումի քննարկումը ներկա փուլում դուրս է ՀՀ դատախազության լիազորությունների տիրույթից: Նախագահ Արմեն Սարգսյանը նույնպես չի մասնակցի Արցախում կայանալիք միջոցառումներին, նա գերադասել էր մասնակցել Հայաստանում կայանալիք միջոցառումներին։ Մայիսի 9-ին Արցախ է մեկնելու նաև ՀՀ վարչապետ Նիկոլ Փաշինյանը: Տոնի առթիվ Արցախ է մեկնել նաև ՀՀ երրորդ նախագահ Սերժ Սարգսյանը։ Արցախ է հրավիրվել նաև ՀՀ նախկին փոխվարչապետ Արմեն Գեւորգյանը, ով մարտի 1-ի գործով մեղադրյալ է։ Դատարանը թույլատրել է նրան մեկնել Արցախ: