Վալերի Օսիպյանը ԱՄՆ փոխպետքարտուղարի տեղակալի հետ քննարկել են թմրամիջոցների դեմ պայքարի ոլորտում համագործակցության հարցեր

Ոստիկանության պետ Վալերիյ Օսիպյանը մայիսի 6-ին հանդիպել է  ԱՄՆ փոխպետքարտուղարի թմրամիջոցների դեմ պայքարի և իրավապահ համագործակցության հարցերով տեղակալ Ջորգեն Էնդրյուսի, ՀՀ-ում ԱՄՆ դեսպանության Թմրամիջոցների դեմ պայքարի և իրավապահ համագործակցության ծրագրի տնօրեն Մայքլ Շուլմանի, ծրագրի իրավական գործերով ավագ խորհրդատու Ադի Հոլովեյի և համակարգող Մարիցա Հովհաննիսյանի հետ: Այս մասին տեղեկանում ենք ոստիկանության պաշտոնական կայքից։

Վալերիյ Օսիպյանը ողջունել է հյուրերին և ներկայացրել ՀՀ ոստիկանությունում ընթացող բարեփոխումները, որոնք ընդգրկում են տարբեր ոլորտներ՝ սկսած օրենսդրական փոփոխություններից մինչև ծառայողների սոցիալական ապահովության բարելավում և առաջիկայում նախատեսվող պարեկային ծառայության կազմավորում: Կողմերն ընդգծել են, որ ժամանակակից մարտահրավերներին հակազդելու համատեքստում արդյունավետ է փորձի փոխանակումը իրավապահ մարմինների հետ՝ համակարգային բարեփոխումների, կրթական, հասարակական կարգի ապահովման և մի շարք այլ բնագավառներում:

Հանդիպման ընթացքում քննարկվել է, թե ԱՄՆ Թմրամիջոցների դեմ պայքարի և իրավապահ համագործակցության բյուրոն իրավապահ ոլորտի իր փորձառությամբ ինչպես կարող է աջակցել Հայաստանի ազգային ոստիկանությանն իր հավակնոտ բարեփոխումներում, ինչպես նաեւ՝ փոխադարձ հետաքրքրություն ներկայացնող մի շարք այլ հարցեր: