Աղբատար մեքենաների գնմանը հատկացված 236 մլն դրամը չի ազդի մանկապարտեզների հիմնանորոգման վրա. Հակոբ Կարապետյանի պատասխանը՝ Խաժակյանին
Երևանի քաղաքապետ Հայկ Մարությանն ապրիլի 29-ին կրճատել է մանկապարտեզների շենքերի վերանորոգման և հիմնանորոգման բյուջեն 243 մլն դրամով, որից 236 մլն վճարել մեկ անձով ձեռք բերված աղբատար մեքենաների համար: Այս մասին իր ֆեյսբուքյան էջում գրել է ավագանու «Լույս» խմբակցության ղեկավար Դավիթ Խաժակյանը:
«Քաղաքապետը ապրիլի 29-ին կրճատել է մանկապարտեզների շենքերի վերանորոգման և հիմնանորոգման բյուջեն 243 մլն դրամով, որից 236 մլն վճարել մեկ անձով ձեռք բերված աղբատար մեքենաների համար։ Մակնիշը չեմ նշում․ կարծում եմ գուշակում եք։
Երկրորդ նկարում փակագծերի մեջ նշված է մանկապարտեզների շենքերից կրճատված գումարը, իսկ երկրորդում աղբատարների գնման վերաբերյալ տեղեկությունը»,-գրել է նա՝ կից հրապարակելով լուսանկարները:
Ի պատասխան Երևանի քաղաքապետի մամուլի քարտուղար Հակոբ Կարապետյանը ֆեյսբուքյան իր էջում պարզաբանում է ներկայացրել.
«Դավիթ Խաժակյանը ճիշտ է նկատել՝ մայրաքաղաքի բյուջեում տեղի է ունեցել հոդվածափոխություն, և 236 մլն դրամ է հատկացվել՝ աղբատար մեքենաների հրատապ գնումը կազմակերպելու համար:
Իսկ գումարը վերցվել է նախակրթական հաստատությունների հիմնանորոգման համար նախատեսված գումարից: Բանն այն է, որ հիմնանորոգումների տարեկան ծրագրով նախատեսված մանկապարտեզներից շուրջ 30-ը ֆինանսավորելու է ՄԱԿ-ի Զարգացման ծրագիրը, այսինքն, Երևանի բյուջեից խնայված միջոցները տարվա վերջում դառնալու էին տնտեսում: Փոխարենը, դրանք արդեն այս պահին կծառայեն քաղաքին՝ աղբահանության կարևորագույն խնդիրը լուծելու համար:
Մանկապատեզների հիմնանորոգման համար նախատեսված տարեկան բյուջեն, հիշեցնեմ, մոտ 1.5 միլիարդ էր: Հոդվածափոխության արդյունքում վերանորոգումների ծավալներ չեն փոփոխվի՝ կնորոգվի նույքան մանկապարտեզ, որքան նախատեսված էր տարեսկզբին:
Սա սովորական հոդվածափոխություն է, որն արվում է բյուջետային տարվա ընթացքում տասնյակ անգամներ տարբեր հոդվածներով` տնտեսումների առավել արդյունավետ օգտագործման եւ բյուջեի դինամիկության ապահովման նպատակով»,-գրել է Կարապետյանը: