«Դա սպառնալիք է». Բագրատյանի` ԱԺ նիստերը տարեկան 2 անգամ մարզերում անցկացնելու առաջարկը կառավարությունը մերժեց

Կառավարությունն իր այսօրվա՝ մայիսի 2-ի նիստում բացասական եզրակացություն տվեց ԱԺ ԲՀԿ խմբակցության պատգամավոր Սերգեյ Բագրատյանի «Ազգային ժողովի կանոնակարգ» սահմանադրական օրենքում լրացումներ կատարելու վերաբերյալ օրենսդրական նախաձեռնությանը, որով առաջարկում է ԱԺ նիստերը տարին երկու անգամ անցկացնել արտագնա՝ մարզերում:

Հիմնական զեկուցող արդարադատության նախարար Արտակ Զեյնալյանը նշեց, որ այստեղ կա խնդիր: «Ապահովել այդ ողջ ընթացակարգը մեծ ծախսերի ու բարդությունների հետ է կապված: Դա տնտեսապես եւ գործնականորեն օրենքի ընդունման անհրաժեշտությունից չի բխում, քանի որ արարողակարգային բնույթ չի կրում եւ չի ծառայի նպատակին, որը հետապնդվում է առաջարկով»,- ասաց Զեյնալյանը:

Նա ընդգծեց. «Եթե կա անհրաժեշտություն մարզերում անցկացնելու նիստերը, Ազգային ժողովը կարող է աշխատակարգի երկրորդ հոդվածի համաձայն այն իրականացնել: Բայց օրենքով ֆիքսել, որ տարին երկու անգամ ԱԺ նիստերն անցկացվեն մարզերում, կարծում եմ՝ դա անհամաչափ բեռ եւ ծախս է պետական բյուջեի համար եւ կարող է նաեւ սպառնալիք հանդիսանալ ԱԺ պատգամավորների անվտանագությանը»:

Վարչապետ Նիկոլ Փաշինյանն էլ ասաց, որ դա կնշանակի, որ ամեն մարզում պետք է ստեղծել, կահավորել դահլիճ ԱԺ նիստերի անցկացման համար: «Նիստի ընթացքում պատգամավորը պետք է աշխատելու հնարավորություն ունենա՞, թե՞ ոչ: Միայն նիստերի դահլիճը չէ, պատգամավորը պետք է նաեւ աշխատասենյակ ունենա: Նիստը սպասարկվում է աշխատակազմի կողմից, այդ աշխատակազմը պետք է նույնպես տեղափոխվի այնտեղ»,- նկատեց վարչապետը:

Ըստ նրա՝ այս ամենը մեծ ծախսերի հետ է կապված. «ԱԺ կանոնակարգով» ԱԺ հանձնաժողովները կարող են նիստերն անել արտագնա: Առաջարկի տրամաբանությունը վատը չէ, բայց ԱԺ նիստը մարզերում անելը երկար ժամանակ եւ մեծ ծախսեր է պահանջում: Ինձ միշտ հետաքրքրել է՝ ինչ կարծիքի են մեր վրացի գործընկերները Ազգային ժողովը Թբիլիսիից Քութայիսի տեղափոխելու մասին: Ինչքան ես շփվել եմ պատգամավոր եղած ժամանակ վրացի գործընկերների հետ, նրանք ասում են, որ որոշումն այդքան էլ չի արդարացրել իրեն ու բարդություններ է առաջացել», - նշեց վարչապետը: