Բրիտանիայում գտել են ոսկե մետաղադրամներ «Սև մահ» համաճարակի ժամանակաշրջանից

XIV դարի հազվագյուտ
ոսկե եւ արծաթե մետաղադրամների գանձարանը, որը գնահատվում է 195 հազար
դոլար, բրիտանացի չորս գանձերի որսորդներ գտել են մետաղադետեկտորների
միջոցով: Daily Mail-ի հաղորդմամբ՝ 12 խոշոր ոսկե մետաղադրամները պատկանում
են դրամագիտական հազվագյուտ իրերի շարքին «Սեւ մահ» ժանտախտի համաճարակի
ժամանակաշրջանից (1348-1349):

Փորձագետները համարում են, որ հայտնաբերված մետաղադրամների մեծ մասը
դրոշմվել է 1272-1327 թվականների ընթացքում՝ Պլանտագենետների դինաստիայից
թագավոր Էդուարդ I-ի (1239-1307) եւ Էդուարդ II-ի (1284-1327) իշխանության
օրոք: Ըստ գիտնականների՝ Համբլդենյան գանձարանը (Համբլդեն գյուղի պատվին,
որի մոտակայքում էր գտնվել գանձարանը) թաղվել էր հարուստ մարդկանցից մեկի
կողմից շուրջ վեց դար առաջ:

Մի քանի արծաթյա մետաղադրամներ հայտնաբերելուց հետո, գրում է թերթը,
Էնդրյու Վինթերը, Թոբիաս եւ Մաթեուշ Նովակ եղբայրները, ինչպես նաեւ իրենց
ընկեր Դարիուշ Ֆիալկովսկին ընդլայնել էին որոնման տարածքն ու հայտնաբերել
ընդհանուր առմամբ 550 մետաղադրամ: Թերթի տեղեկություններով՝ Համբլդեն
գյուղի մասին գրառում կա «Ահեղ Դատաստանի օրը» գրքում (Domesday Book),
Եվրոպայում առաջին միջնադարյան համընդհանուր մարդահամարում, որն անցկացվել
էր Անգլիայում 1085-1086 թվականներին Վիլհելմ I Նվաճող-ի (1027/1028 - 1087) հրամանով:

Մաթեուշ Նովակի խոսքերով՝ «գտածոն պարզապես անհավանական է, այն ինքնատիպ
հրաշք է բոլորիս համար»: «Դա մեծ հաջողություն է մեզ համար: Դրանք իմ
կյանքի ամենալավ հանգստյան օրերն էին, որոնք ես կհիշեմ ողջ կյանքում»,-նշել
է նրա եղբայր Թոբիասը: Նրանք ստիպված էին անցկացնել չորս գիշեր վրանում՝
հայտնաբերված մետաղադրամների հնարավոր թալանը թույլ չտալու համար:

Այժմ գանձերը պահվում են թանգարանում. դրանց պաշտոնական գնահատումը դեռ
տեղի չի ունեցել: Այնուհետեւ մետաղադրամները աճուրդի կհանվեն, իսկ ստացված
գումարը կիսվի դրանք հայտաբերած մարդկանց եւ հողի, որտեղ մետաղադրամները
հայտնաբերվել էին, սեփականատերերի միջեւ :