Երևանում Ֆրանկոֆոնիայի օրերին նվիրված ջազ համերգ Երևանի Կոմիտասի անվան պետական կոնսերվատորիայում
Ապրիլի 19, 2019, Երևան – Ս.թ. ապրիլի 17-ին Երևանի Կոմիտասի անվան
պետական կոնսերվատորիայի ջազ-էստրադային ամբիոնի նախաձեռնությամբ՝ ի
դեմս ամբիոնի վարիչ Նարինե Զարիֆյանի, Ակուստիկ լաբորատորիայում տեղի
ունեցավ համերգ` նվիրված Երևանում Ֆրանկոֆոնիայի օրերին: Համերգի պատվավոր
հյուրերն էին Հայաստանում Ֆրանսիայի դեսպանության Մշակույթի և
համագործակցության հարցերով խորհրդական Ալեքս Բորտոլանը, Անատոլ Ֆրանսի
անվան Ֆրանսիական դպրոցի տնօրեն Մարտեն Բեկերը, ինչպես նաև դպրոցի
Վարչական և ֆինանսական տնօրեն Լուսինե Թևոսյանն ու ֆրանսերեն լեզվի ուսուցիչ
Անն Ժէն:
«Մեծ ոգևորությամբ կազմակերպեցինք այս համերգը, որն առաջին
հնարավորությունը դարձավ ԵՊԿ-ի ջազ-էստրադային ամբիոնի ուսանողների
համար՝ մասնակցելու Հայաստանում «Ֆրանկոֆոնիայի սեզոն» միջոցառումների
շարքին: Նմանատիպ ելույթները կլինեն շարունակական՝ ամբիոնի մնացած բոլոր
ուսանողներին Ֆրանկոֆոնիային նվիրված տոնակատարություններին ներգրավելու
համար», - նշում է ջազ-էստրադային ամբիոնի վարիչ Նարինե Զարիֆյանը:
Շնորհակալություն հայտնելով հյուրերին համերգին ներկա գտնվելու համար`
միջոցառման վարող, ջազ-էստրադային ամբիոնի չորրորդ կուրսի ուսանող Նարինա
Մկրտչյանը խոսեց հայ-ֆրանսիական բարիացակամ հարաբերությունների և
Հայաստանում ֆրանսիական մշակույթի և լեզվի արժևորման մասին: Ողջույնի
խոսքին հաջորդեցին ԵՊԿ-ի ջազ-էստրադային ամբիոնի բակալավրիատի և
մագիստրատուրայի ուսանողների ֆրանսերեն լեզվով կատարումները: Հնչեցին
աշխարհահռչակ ֆրանսիացի շանսոնիե Էդիթ Պիաֆի «Non, je ne regrette rien» և
բելգիացի երգչուհի Լառա Ֆաբիանի «Je t’aime» ստեղծագործությունները, ինչպես նաև
ժամանակակից կատարողներ ԶԱԶ-ի «Les Passants» և «Je veux» ու Ինդիլայի «Dernière
dance» երգերը:
Ֆրանսիական երաժշտությանը նվիրված որևէ միջոցառում չի կարող համարվել
լիարժեք առանց աշխարհահռչակ ֆրանսիահայ շանսոնիե Շառլ Ազնավուր(յան)ի
ստեղծագործությունների: Այդ կապակցոթյամբ բակալավրիատի երկրորդ կուրսի
ուսանող Արսեն Զաքարյանը, ով վերջերս արժանացավ Հայ-ռուսական (Սլավոնական)
համալսարանի կողմից կազմակերպված ֆրանսիական երգի ամենամյա մրցույթի
«Շառլ Ազնավուրի երգի լավագույն կատարում» անվանակարգի երկրորդ մրցանակին,
կատարեց նրա «La Mamma» և «Quand tu m’aimes» գործերը:
Համերգի ավարտն ազդարարող Շառոյան Բենդ (Sharoyan Band) հայկական
մոտիվներով ջազային ստեղծագործությունների ու Դավիթ Պարոնիկյանի և ընկերների
կատարումներից հետո կարճ ելույթ ունեցավ Ֆրանսիայի դեսպանության Մշակույթի
և համագործակցության հարցերով խորհրդական Ալեքս Բորտոլանը: Շնորհավորելով
ԵՊԿ-ին և ջազ-էստրադային ամբիոնի ուսանողներին ֆրանսերեն հրաշալի ելույթների
առթիվ, նա հայտնեց, որ հուլիսի 14-ին՝ Բաստիլի գրավման օրը, Հայաստանում տեղի
է ունենալու համերգ նվիրված Շառլ Ազնավուրի հիշատակին, որին կմասնակցի
բարիտոն Ժեղեմի Դելվեղի ղեկավարած Ֆրանսիայի Հանրապետական պահակախմբի
քառյակը: Բորտոլանը նշեց նաև հունիսի 23-ին կայանալիք Երաժշտական փառատոնի
(Fête de la Musique) մասին, որին կմասնակցեն ֆրանսիահայ կիթառահար Դան
Ղարիբյանն ու նրա եռյակը:
«Շատ լավ է, որ Կոնսերվատորիան նույնպես միանում է Հայաստանում
«Ֆրանկոֆոնիայի սեզոն»-ին: Սիրով պատրաստ ենք համագործակցել
Կոնսերվատորիայի հետ երաժշտական միջոցառումների կազմակերպման հարցում»,
- ասաց Բորտոլանը