Քաղաքապետարնն ամեն ինչ անում է մեկ ընկերությունից 900 մլն դրամի գնում անելու համար. Դավիթ Խաժակյան

«Լույս» խմբակցության ղեկավար Դավիթ Խաժակյանը լրագրողների հետ զրույցում հայտարարեց, որ քաղաքապետարանը Երևանում աղբահանությունն ապահովելու համար մեքենաների գնման մրցույթն անցկացնում է օրենքի խախտումներով:

Նրա խոսքով՝ քաղաքապետարանը փորձում է մեկ կազմակերպությունից գնել բոլոր մեքենաները. «900 մլն դրամանոց գնումը նման կերպ իրականացնելը ճիշտ չէ, և պետք է այն լինի բացարձակ օրինական: Քաղաքապետարանն այդուհանդերձ, մեր այդ կոչերը չլսեց»:

Դավիթ Խաժակյանը նշեց, որ քաղաքապետարանը հայտարարած մրցույթում մեքենաների տեխնիկական բնութագրում ներկայացրել է 6 այնպիսի պահանջ, որին համապատասխանում է ընդամենը 1 մակնիշի մեքենա, որը ներկրում է միայն «ԿամԱԶ» ընկերությունը. «Ստացվում է՝ մյուս կազմակերպությունները, որոնք կարող էին մասնակցել մրցույթին, այդ հնարավորությունը չունեին, որովհետև մրցույթի տեխնիկական պահանջները կազմված էին հենց այդպես»:

Դավիթ Խաժակյանը նշեց, որ այդ հարցով դիմել է Երևանի քաղաքապետ Հայկ Մարությանին՝ նշելով, որ տեխնիկական պահանջները չփոխելու դեպքում մյուս կազմակերպությունները կարող են դիմել դատարան, որի հետևանքով մեքենաների ձեռքբերման գործընթացը կերկարի.

«Բայց իրավիճակը գնաց այլ ուղղությամբ. գնումների բողոքարկման խորհրդի ներկայացուցիչը այդ գնումը կասեցրեց: Քաղաքապետարանին պարտավորեցրին փոխել տեխնիկական բնութագրերը և հայտարարել նոր մրցույթ: Այդ ժամանակ կրկին քաղաքապետին դիմեցի, որ շատ արագ մրցույթ հայտարարվի, որի դեպքում մենք այսօր իսկ կունենայինք նոր մեքենաներ: Սակայն քաղաքապետարանը դիմեց դատարան՝ գնումների բողոքարկման խորհրդի որոշումը վիճարկելու համար: Քաղաքապետարանը շատ լավ գիտակցում էր, որ դատարան դիմելու դեպքում այդ գործընթացը շատ երկար կարող է տևել՝ ամիսներ, տարիներ, բայց դիմեց այդ քայլին»:

Խաժակյանը դիտավորություն է տեսնում քաղաքապետարանի այս քայլում: Ասում է՝ Քաղաքապետարանը գիտակցված է դիմել դատարան՝ քաղաքում աղբահանության ճգնաժամ ստեղծելու համար.

«Եվ այսօր քաղաքապետարանը դիմել է Կառավարություն, որի այսօրվա օրակարգում պետք է քննարկվի հարց, որով քաղաքապետարանին պետք է հնարավորություն տրվի մեկ անձից գնում իրականացնելու: Ես պնդում եմ՝ քաղաքապետարանը հստակ կատարել է գործողություններ, որ գնումը, ի վերջո, կատարի մեկ կազմակերպությունից: Սա նոր Հայաստանի պատմության մեջ գուցե առաջին դեպքն է, որ քաղաքի և պետության մակարդակով հակամրցակցային համաձայնություն է տեղի ունեցել և պայմանավորվածություն է ձեռք բերվել մեկ կազմակերպության հետ՝ կատարելու գնումը»: