Մշակույթի և գյուղնախարարությանը վերաբերվում եք որպես կոստյումի կոճակների՞. Զեյնալյանը՝ Մարուքյանին
ՀՀ արդարադատության նախարար Արտակ Զեյնալյանն ապրիլի 18-ին խորհրդարանում ելույթ ունենալիս հանդես եկավ, իր իսկ գնահատմամբ, «Լուսավոր Հայաստան» խմբակցության ղեկավար Էդմոն Մարուքյանի ոճով:
«Ես կխնդրեի պարոն Մարուքյանին՝ ինձ տրամադրել վահանակները, որ կազմել եք: Չե՞ք կարող տալ, շատ փող եք ծախսել, դրա համա՞ր: Դրանք ընթեռնելի չէին, բայց դիզայնի համար կարևոր են, կուզեի ունենալ իմ ձեռքի տակ ձեր վատ կառուցվածքը, մեր լավ կառուցվածքը: Ես փորձում եմ նմանակել ձեր ոճը, ինչ ոճով որ ներկայացնում եք իրերը»,- ասաց նա:
Զեյնալյանը հիշեցրեց՝ Մարուքյանն ասում է՝ համոզված է, որ ուռճացված է պետական ապարատը, բազմիցս հնչեցրել է դրա մասին, հետաքրքրվեց՝ կարո՞ղ է հիշատակել այն աղբյուրը, այն վերլուծությունը կամ կարիքների գնահատումը, որի վրա հիմնվել է:
«Չունե՞ք այդպիսի վերլուծություն: Ինչի՞ վրա եք հիմնվել: Ասում եք՝ ներկայացրել եք ձեր կառուցվածքը՝ նախարարությունների ցանկը և կառավարության կառուցվածքը, մեզ մեղադրում եք, որ վերցրել ենք Սերժ Սարգսյանի կոստյումը և վրայից կտրել ենք ընդամենը երկու կոճակ: Այն նախագիծը, որ ներկայացրել եք, մեր նախագիծն է, վերցրել եք, հիմքում կատարել փոփոխություններ, եթե մերը ինչ-որ մեկի կոստյումն է, ձերը ավելի շատ կամ քիչ ձևափոխված այդ կոստյումը: Ի՞նչ նկատի ունեք՝ ասելով, որ երկու կոճակ եք կտրել, նկատի ունեք՝ գյուղնախարարությունը և մշակույթի նախարարությունը, իրականում հոգու խորքում այդ նախ վերաբերվում եք որպես կոստյումի երկու կոճակի՞»,- հարց ուղղեց նա: