Լեզվի մեջից են հանել փամփուշտը. Յուրի Տեփանոսյանի իրավահաջորդ
«Տեղեկություն ունեին, որ սնայպերը վերևից խփել է, այնտեղ այդպես էին խոսում, մի քիչ ուշ եմ գնացել, կանգնել եմ մոր, հարսի կողքը»,- ՊՊԾ գնդի գրավման գործով դատաքննության ժամանակ այսօր պատմել է զոհված ոստիկան Յուրի Տեփանոսյանի իրավահաջորդ Տիգրան Գրիգորյանը:
Նա դատարանում ներկայացավ որպես ընտանիքի քավոր, ասաց, որ ներկա է եղել դիակի դատաբժշկական փորձաքննությանը:
«Ես գնացել եմ, դիահերձմանը մասնակցել եմ: Իմ աչքի առաջ Յուրի Տեփանոսյանին մերկացրել են. տեսել եմ, որ իր վրա ոչ մի հետք չի եղել, գլուխը բացելուց հետո լեզվի մեջից հանել են փամփուշտը: Կարմիր սանտիմետրի վրա չափել են գնդակը, իմ ներկայությամբ գրել են: Դա լրիվ լուսանկարված է», պատմեց Գրիգորյանը:
Մեղադրող Պետրոս Պետրոսյանը հարցրեց՝ Յուրի Տեփանոսյանի ծառայության վերաբերյալ մանրամասներ կարո՞ղ է հայտնել, Տիգրան Գրիգորյանն ասաց, որ ուրախ գնացել, ուրախ հետ եկել, ծառայել է ներքին զորքերում, ոչ մի հարցով իրեն չի դիմել:
Նա նշեց, որ սպանությունը տեղի է ունեցել 2016 թվականի հուլիսի 30-ին՝ ժամը 16.30-17.00-ի սահմաններում:
Հիշեցնենք՝ ըստ մեղադրանքի՝ 2016 թվականի հուլիսյան դեպքերի ժամանակ ենթասպա Յուրի Տեփանսյանը զոհվել է դիպուկահարի կրակոցից՝ ոստիկանության մեքենայի հետևի նստատեղին նստած:
Ըստ մեղադրանքի՝ սպանողը եղել է ՊՊԾ գունդը գրաված զինված խմբի անդամ Սմբատ Բարսեղյանը:
Զոհված ոստիկանը հետմահու ստացել է լեյտենանտի կոչում: