ՀՀ նախագահը լիազորված չէր ՍԴ դատավորի թեկնածուի ընտրության համար աշխատանքային խումբ ձևավորել. զեկույց

ՀՀ նախագահը լիազորված չէր ՍԴ դատավորի թեկնածուի ընտրության համար աշխատանքային խումբ ձևավորել: Այս մասին ասվում է «Իրավական ուղի» իրավապաշտպան հասարակական կազմակերպության զեկույցում, որը կազմվել է ՀՀ սահմանադրական դատարանի դատավորի թեկնածուի՝ ՀՀ նախագահի կողմից ընտրության և ՀՀ ազգային ժողով առաջադրման գործընթացի իրավաչափության մշտադիտարկման արդյունքներով։

Զեկույցի ամփոփ եզրակացությունները հետևյալն են.

«1) ՀՀ նախագահի կարգադրությամբ կամ ՀՀ նախագահի որևէ այլ իրավական ակտով Սահմանադրական դատարանի դատավորի թեկնածուի առաջադրումն ապահովելու կամ որևէ այլ հարցով աշխատանքային խմբի կամ որևէ այլ խորհրդակցական մարմնի ձևավորումն ինքնին իրավաչափ չէ՝ նման լիազորության բացակայության պատճառով։

2) Հանրապետության նախագահի 2019թ․ հունվարի 31-ի ՆԿ-5-Ա կարգադրությամբ սահմանված և անցկացված ընթացակարգը չի համապատասխանել արդարության և թափանցիկության սկզբունքներին:

3) Հանրապետության նախագահի 2019թ․ հունվարի 31-ի ՆԿ-5-Ա կարգադրությամբ խորհրդակցական ժամանակավոր աշխատանքային խմբի կազմավորման հիմքում ընկած մոտեցումը համարժեք չէ Սահմանադրական դատարանի դատավորի առավել արժանավոր թեկնածու ի հայտ բերելու խնդրին:

4) Հանրապետության նախագահի 2019թ․ հունվարի 31-ի ՆԿ-5-Ա կարգադրությամբ խորհրդակցական ժամանակավոր աշխատանքային խմբին վերապահված իրավական գործիքակազմը համարժեք չի եղել Սահմանադրական դատարանի դատավորի առավել արժանավոր թեկնածու արդյունավետ ձևով ի հայտ բերելու խնդրին։

5) Սահմանադրական դատարանի դատավոր ընտրելու գործընթացի քաղաքականացվածություն ենթադրող ինստիտուցիոնալ մոդելի պայմաններում, թեկնածուի ընտրության 3/5-ի շեմը հաղթահարած դոմինանտ քաղաքական ուժի ներկայացուցիչների կողմից՝ չառաջադրված թեկնածուի նախընտրելի լինելու վերաբերյալ բացահայտ դիրքորշումները, համակցված իրավական արգելքը վերացնելուն միտված օրենսդրական նախաձեռնությամբ, վկայում են գործընթացի նկատմամբ քաղաքական ազդեցությունների բարձր մակարդակի մասին»։

Հիշեցնենք, որ Ազգային ժողովում ընթանում է փակ քվեարկություն։ ՀՀ նախագահի կողմից առաջադրված թեկնածուն՝ Գոռ Հովհաննիսյանը պետք է ստանա պատգամավորների ընդհանուր թվի 3/5-ի (80) քվեն՝ ՍԴ դատավոր ընտրվելու համար։