Եթե գոհ լինեմ, այլևս չեմ աշխատի Սիմոն Մարտիրոսյանի հետ. Փաշիկ Ալավերդյան
Armsport-ը գրում է.
Ծանրամարտի տղամարդկանց Հայաստանի հավաքականի գլխավոր մարզիչ Փաշիկ Ալավերդյանը մեկնաբանել է Ռիո-2016 Օլիմպիական խաղերի փոխչեմպիոն Սիմոն Մարտիրոսյանի հաղթանակը Վրաստանի Բաթումի քաղաքում ավարտին մոտեցող ծանրամարտի Եվրոպայի առաջնության 109 կգ քաշային կարգում:
«Հաղթողին չեն դատում, իսկ եթե ես գոհ լինեմ, այլևս չեմ աշխատի նրա հետ:
Ես ոչ մեկից էլ գոհ չեմ, նույնիսկ՝ ձեզանից: Երբ ես գոհ լինեմ, այլևս չեմ աշխատի: Ամեն բան շատ լավ էր՝ հատկապես, որ Սիմոնը վնասվածք ուներ: Բժիշկները քրտնաջան աշխատանքով կարողացան ոտքի կանգնեցնել նրան: Չնայած նրան օգնության ձեռք է մեկնել նաև Գագիկ Ծառուկյանը՝ մեզ օգնելով բժշկի ու այլ հարցերում: Այնպես որ՝ դեպի աշխարհի առաջնություն»,- Փաշիկ Ալավերդյանի խոսքը մեջբերել է ՀԱՕԿ լրատվականը։
Հիշեցնենք, որ աշխարհի գործող չեմպիոնը երկամարտում գրանցել էր 427 (192+235) կգ արդյունք և 16 կգ գերազանցել երկրորդ տեղը գրաված բելառուս Անդրեյ Արամնաուին: Սիմոն Մարտիրոսյանը փոքր ոսկե մեդալներ էր նվաճել նաև պոկում ու հրում վարժություններում: Նախորդ տարվա նոյեմբերին Թուրքմենստանի մայրաքաղաք Աշգաբադում անցկացված ծանրամարտի աշխարհի առաջնությունում Սիմոն Մարտիրոսյանը չեմպիոնի կոչումը նվաճել էր երկամարտի 435 (195+ 240) կգ արդյունքով և սահմանել աշխարհի ռեկորդ:
Եվրոպայի առաջնությունում սա Հայաստանի չորրորդ մեդալն էր երկամարտում: Ապրիլի 13-ին Հայաստանի ներկայացուցիչ Սամվել Գասպարյանը (102 կգ) դարձել էր Եվրոպայի փոխչեմպիոն: Ավելի վաղ 89 կգ քաշային կարգում Հակոբ Մկրտչյանը նվաճել էր Եվրոպայի չեմպիոնի կոչումը, իսկ Դավիթ Հովհաննիսյանը դարձել էր բրոնզե մեդալակիր: