Անգղերին կերով չեն ապահովում, նրանց արհեստականորեն կերակրելու կարիք չկա. «Արավես» ՀԿ–ի տնօրեն
«Արավես» բնության պահպնության ՀԿ–ն եւ Վայրի բնության եւ մշակութային արժեքների պահպանման հիմնադրամը չեն կարող շների ստերջացում իրականացնող կազմակերպության հետ համագործակցել եւ նրանցից շուն վերցնել անգղերին կերակրելու համար։ Այս մասին ասաց «Արավես» ՀԿ–ի տնօրեն Սիրանուշ Թումանյանը՝ խոսելով Վայրի բնության եւ մշակութային արժեքների պահպանման հիմնադրամի տարածած տեսանյութի մասին, որտեղ անգղերը շան մարմին են պատառ–պատառ անում։
«Տեսանյութում Արարատի մարզի Սեւակավան գյուղն է։ Այնտեղ որեւէ
ոչխարապահի շունն է, որը սատկել է, իսկ տարածքը գյուղից քանի որ
մեկուսացված է, անգղերն եկել ու սնվել են։ Շատ հնարավոր է, որ ոչխարապահը
երբ մորթ է անում, մնացորդները թողնում է այդ տեղում, այդպես շատ են անում։
Անգղերը սովոր են եղել տարածքին»,–նշեց նա։
Նա շեշտեց՝ անգղերին կերով չեն ապահովում, քանի որ դրա կարիքը չկա.
«Անգղերին կերով չեն ապահովում, այս արտահայտությունը սխալ է, նրանք
փնտրում եւ գտնում են իրենց կերը։ Արհեստականորեն ոչ մեկ կեր չի տեղափոխում
անգղերին կերակրելու համար։ Գյուղերում անասունների եւ վայրի կենդանիների
քանակը վայրի բնության մեջ այնպիսին է, որ անգղերին արհեստականորեն
կերակրելու կարիք չկա»,–նշեց ՀԿ–ի տնօրենը։
Երեւանի կենդանաբանական այգու նախկին աշխատակցի այն դիտարկմանը,
թե Վայրի բնության եւ մշակութային արժեքների պահպանման հիմնադրամը
պատկանում է Երեւանի կենդանաբանական այգու տնօրեն Ռուբեն Խաչատրյանին, որը
նաեւ աջակցում է Երեւանի քաղաքապետարանին՝ թափառող շների հավաքագրման
գործընթացում, եւ հենց շուն է հայտնվում Ռուբեն Խաչատրյանի
կազմակերպությանը պատկանող տարածքում, անգղերը շուն են ուտում, Սիրանուշ
Թումանյանը պատասխանեց. «Ոչ մեկ Երեւանից 100 կմ–ից ավելի չի քշի եւ շուն
չի տանի անգղ կերակրելու համար։ Եթե արհեստական կերակրելու կարիք լինի,
համապատասխան կազմակերպությունը կգնի մնացորդներ կամ հիվանդ կենդանի,
որովհետեւ անգղերը հիվանդ կենդանի էլ են ուտում։ «Արավես» բնության
պահպնության ՀԿ–ն եւ Վայրի բնության եւ մշակութային արժեքների պահպանման
հիմնադրամը չեն կարող շների ստերջացում իրականացնող կազմակերպության հետ
համագործակցել եւ իրենցից շուն վերցնել անգղերին կերակրելու համար»։
Նա նաեւ շեշտեց՝ անգղերի բոլոր տեսակները միջազգային «Կարմիր գրքում» են գրանցված եւ խիստ պահպանվող կենդանիներ են։