«Գլոբբինգը» առաքում է բոլոր այն ծանրոցները, որոնք հասել են մեր պահեստ. եթե չի հասել, մեղավորը մենք չենք». տնօրեն
«Գլոբբինգ»-ն իր ծառայություններն իրականացնում է 7 երկրում ունեցած իր պահեստների միջոցով, մեր հաճախորդները իրենց ծանրոցները բերում են մեր պահեստ, մենք առաքում ենք Հայաստան: Այս մասին այսօր՝ ապրիլի 12-ին, լրագրողների հետ զրույցում նշեց Հայաստանում «Գլոբբինգի» հիմնադիր տնօրեն Դավիթ Հարությունյանը՝ անդրադառնալով մամուլի հրապարակումներին, որ «Գլոբբինգ» ընկերության միջոցով օնլայն առեւտուր անող ՀՀ քաղաքացիները հայտնվել են անելանելի վիճակում:
Նա պարզաբանեց, որ միայն Ռուսաստանի դեպքում է, որ խնդիր է առաջացել. «Բանն այն է, որ «Ռուսաստանի փոստը» ոչ միշտ էր պարտաճանաչ առաքում, մենք երբեմն փորձել ենք գնալ փոստային բաժանմունք, որի պարտականությունը չենք ունեցել, չենք ստանձնել, չենք խոստացել մեր հաճախորդներին եւ փորձել ենք մեր հաճախորդների ծանրոցները ստանալ: Որոշ ժամանակ դա անելուց հետո հասկացել ենք, որ մենք եւ «Ռուսաստանի փոստը» տարբեր ենք վերաբերվում մեր խոստմանը հաճախորդներին սպասարկելուն: Դեպքեր են եղել, գնացել ենք, ասել ենք՝ ծանրոցները տվեք, մեզ ասել են՝ չկա, չունենք, ինքներդ գտեք եւ այլն:
Բնականաբար, չենք կարող պատասխանատվություն կրել «Ռուսաստանի փոստի» առաքման որակի համար: Այսուհետեւ մենք չենք գնում փոստային բաժանմունք, այլ ինչպես բոլոր մնացած երկրներում սպասում ենք, ինչ բերվում է մեր մոտ, առաքում եքն Հայաստան»,-ասաց նա:
Դավիթ Հարությունյանը նշեց, որ իրենք մինչեւ հիմա փորձել են բանակցել այդ ընկերության աշխատակիցների հետ, չի ստացվել փոխել իրենց մոտեցումը:
«Թե ինչու է «Ռուսաստանի փոստը» ոչ միշտ առաքում ծանրոցները եւ մեկ-մեկ պահում է իր մոտ, մենք չենք կարող դրան պատասխանել: Ոնց ուզում են, այդպես էլ անում են»,-ասաց նա:
Հարցին, թե որ երկրներից են ծանրոցները Հայաստան գալիս Ռուսաստանից, Հարությունյանը պատասխանեց, որ հիմնականում հաճախորդները Չինաստանից են պատվիրում դեպի Ռուսաստան. «lobbing-ը պատասխանատվություն չունի Ռուսաստանի փոստը կառաքի, թե չի առաքի: Եղել են դեպքեր, որ մեզ ասել են՝ մտեք ձեր ծանրոցը գտեք, մենք ո՞նց կարող ենք այդ ընկերության որակի համար պատասխանատվություն կրենք մեր հաճախորդների առջեւ»:
Դիտարկմանը, որ այս խնդրի պատճառով տուժում են հաճախորդները, Դավիթ Հարությունյանը նկատեց, որ դեռ հունվարի կեսերին իրենք զգուշացրել են ՌԴ-ից գնում անող բոլոր իրենց հաճախորդներին, որ մեկ ամսից այլեւս չենք գնալու «Ռուսաստանի փոստ», բայց դրանից հետո եւս մեկ ամիսն գնացել ու ծանրոցները վերցրել ենք:
Հարցին, թե ով է ի վերջո պատասխանու սրա համար, նա արձագանքեց. «Ով ապրանքը չի հասցրել մեր պահեստ, նա է պատասխանատու: «Ալի էքսպրեսը» եւ «Ռուսաստանի փոստն» են մեղավոր, մենք ոչ մի տոկոս մեղավորություն չունենք: Մեզ մեղադրում են, քանի որ մեզ մոտիկ ենք: Մեր պարտականությունն է մեր պահեստ մտած ապրանքները Հայաստան բերելը: Մենք երբեք չենք ստանձնել պարտականություն գնալ ու փոստին ինչ-որ բան համոզել»,- իր խոսքն ամփոփեց Գլոբինգի տնօրենը: