World Press Photo-ն անվանել է 2019 թվականի լավագույն լուսանկարը (լուսանկար)

Լացող աղջկա՝ Մեքսիկայի եւ ԱՄՆ սահմանին արված լուսանկարը World Press Photo-ի վարկածով տարվա լավագույն լուսանկարն է։ Այս մասին ասվում է միջազգային մրցույթի կազմակերպիչների մամլո ամփոփագրում, որը տարածվել է Ամստերդամում հանդիսավոր արարողության ավարտին։ Դրա ընթացքում նշվել են հաղթողներն ու մրցանակակիրները տարբեր անվանակարգերում, ինչպես նաեւ շնորհվել են հիշարժան պարգեւներ, տեղեկացնում է ՏԱՍՍ-ը:

Լուսանկարում, որի հեղինակն է Ջոն Մուրը, պատկերված է լացող աղջիկը՝ Յանելան, Հոնդուրասից, այն պահին, երբ ԱՄՆ սահմանապահ ծառայության աշխատակիցը խուզարկում է նրա մորը՝ Սանդրա Սանչեսին։ Սանչեսի խոսքով՝ նա մեկ ամիս էր ծախսել, որպեսզի անցներ ամբողջ Կենտրոնական Ամերիկայով ու Մեքսիկայով՝ մինչեւ հասներ ԱՄՆ, որտեղ ցանկանում էր ապաստան խնդրել։ ԱՄՆ նախագահ Դոնալդ Թրամփի վարչակազմն այդ ընթացքում հայտարարել էր «զրո հանդուրժողության» քաղաքականություն, որի շրջանակում սահմանին կալանված միգրանտները կարող էին ենթարկվել քրեական հետապնդման։ Արդյունքում՝ շատ կալանված ծնողներ բաժանվել էին իրենց երեխաներից եւ ուղարկվել ազատազրկման վայրեր։ Այն բանից հետո, երբ լուսանկարը շրջեց ողջ աշխարհով, ամերիկյան սահմանապահ ծառայությունը հայտարարեց, որ Յանելան ու նրա մայրը չեն գտնվել բաժանված ընտանիքների թվում։ Միեւնույն ժամանակ, հանրային բողոքները հանգեցրին նրան, որ Թրամփը 2018 թվականի հունիսի 20-ին չեղարկեց որոշումը։

«World Press Photo-ի լուսանկարը պետք է զարմացնող լինի, եզակի, արդիական ու հիշվող»,- նշել է ժյուրիի նախագահ Ուիթնի Ջոնսոնը։ Եվ այդ ամենը, նրա կարծիքով, կարելի է ասել հաղթած լուսանկարի մասին։ «Շատ հետաքրքիր մանրամասներ կան,- ասել է Ջոնսոնը։- Սկսած սահմանապահ ծառայության աշխատակցի ռետինե ձեռնոցներից, վերջացրած մոր կոշիկների քուղերի բացակայությամբ»։

«Ֆոտոն այնքան շատ բան է պատմում պատմության մասին ու միեւնույն ժամանակ ստիպում զգալ քեզ կապված նրա հետ,- նկատել է ժյուրիի անդամ Էլիս Մարթինսը։- Լուսանկարում պատկերված է մի այլ տեսակի բռնություն՝ հոգեբանական»։

«Կարծում եմ, որ լուսանկարը շատ մարդկանց սիրտն է հուզել, ինչպես եւ իմը,- ասել է հեղինակը։- Այն մարդկայնացնում է շատ ավելի մեծ պատմություն»։