Ընդամենը 5 րոպեում Ալեն Սիմոնյանը հակասեց ինքն իր մտքին․ Հայկ Սարգսյան
«Իմ քայլը» խմբակցության պատգամավոր Հայկ Սարգսյանը դեմ է նույն խմբակցության պատգամավորների առաջարկած նախագծի որոշ կարգավորումների, որոնք վերաբերում են խաղադրույքներ կատարելու սրահների փակմանը Հայաստանի տարածքում, բացի մի քանի քաղաքներից (Ծաղկաձոր, Մեղրի, Սևան, Ջերմուկ)։ ԱԺ տնտեսական հարցերի հանձնաժողովի նիստի ժամանակ նա դեմ արտահայտվեց կարգավորմանն ու նաև նախագիծը ներկայացնող իր գործընկերոջը՝ Ալեն Սիմոնյանին մեղադրեց ինքն իրեն հակասելու մեջ։
Սարգսյանի խոսքերով՝ երբ խոսվում էր այն մասին, որ գրասենյակների փակման դեպքում մարդիկ կտեղափոխվեն համացանցում խաղադրույք կատարելուն, Սիմոնյանը հերքում էր դա, որովհետև հեռախոսով դժվար է խաղադրույք կատարել, բայց երբ խոսք եղավ, որ կարող են զանգել Մեղրի ու պատվիրել իրենց անունից խաղադրույք անել, Սիմոնյանն ասաց, որ դրա փոխարեն հեռախոսով կանեն իրենց խաղադրույքը։
«Ընդամենը 5 րոպեում պարոն Սիմոնյանն իր առաջարկած մտքին հակասեց… Պարո՛ն Սիմոնյան, խնդրում եմ Ձեր ասածներին 5 րոպեի ընթացքում մի հակասեք։ Ես շատ եմ հարգում Ձեզ, Դուք իմ պայքարի ընկերն եք և այդպիսին կմնաք՝ անկախ ամեն ինչից, բայց ես չեմ կարող իմ խղճի առաջ հանգիստ լինել, եթե այս ամենի մասին չբարձրաձայնեմ»,- ասաց Սարգսյանը։