Պետք չի լարել իրավիճակը, հանգիստ. Ալեն Սիմոնյանի պատասխանը՝ Գևորգ Պետրոսյանին (տեսանյութ)
Պետք չի իրավիճակը լարել. եթե դուք խոսում եք որպես պատգամավոր, որը բավականին մեծ փորձ ունի, եւ ուզում եք իրավիճակը շտկել, պետք չի մանիպուլյացիաների ենթարկել, փորձել ներկայացնել, որ ինչ-որ մեկը ինչ-որ մի խմբի պաշտպան է: Այս մասին այսօր՝ ապրիլի 8-ին, ԱԺ-ում հայտարարեց ԱԺ փոխնախագահ, «Իմ քայլը» խմբակցության պատգամավոր Ալեն Սիմոնյանը՝ դիմելով ԲՀԿ-ական պատգամավոր Գեւորգ Պետրոսյանին:
Վերջինս իր ելույթում անդրադառնալով ԱԺ ամբիոնից լսումների ժամանակ տրանսգենդեր կնոջ ելույթ ունենալու փաստին, անդրադառնալով «Իմ քայլը» խմբակցության պատգամավորներին, նշել էր. «Նախընտրական խոստումների ժամանակ ազնիվ չեք եղել: Ժողովրդին ասեիք, որ գալիս եք այստեղ՝ տրանսգենդերներին ԱԺ ամբիոնը տրամադրելու համար։ Բա խի՞ չէիք մինչեւ էդ ասում։ Հասել, դարձել եք քաղաքական մեծամասնություն ու հետին թվով դարձել եք՝ մարդու իրավունքների պաշտպանության ջատագո՞վ»:
Ալեն Սիմոնյանի ելույթի ժամանակ Գեւորգ Պետրոսյանը տեղից սկսեց խոսել, ինչին Սիմոնյանն արփձագանքեց. «Մի ընդհատեք ինձ, ես ձեր ելույթի ժամանակ ձեզ չեմ ընդհատել»: Նիստը վարող ԱԺ փոխնախագահ Լենա Նազարյանն էլ ասաց. «Ձեզ լսում էին»:
«Ինչ վերաբերում է կանոնակարգին: Եթե ես որպես նախագահող սկսեմ ռեգլամենտ պահել, ապա դա հաճախ մեկնաբանվելու է որպես ընդդիմության ներկայացուցիչների խոսքը սահմանափակել: Ուստի հաշվի առնելով մթնոլորտը, որ կա այսօր ԱԺ-ում, ես եւ իմ բոլոր գործընկերները աշխատում ենք այնպես անել, որ չընդատենք մեկս մյուսին, չզրկենք ելույթի հնարավորությունից: Պետք չի լարել իրավիճակը, հանգիստ»,-ասաց Ալեն Սիմոնյանը:
Նշենք, որ «Իմ քայլը» խմբակցության պատգամավոր Մարիա Կարապետյանն այսօր ԱԺ-ում հայտարարել է, որ ԲՀԿ-ական պատգամավոր Նաիրա Զոհրաբյանը ստել է, երբ հայտարարել է, որ ապրիլի 5-ին ԱԺ-ում Մարդու իրավունքներին վերաբերող լսումների ժամանակ ելույթ ունեցած տրանսգենդերին ինքն է ԱԺ բերել:
«Ես ոչ մի ելույթ չեմ դասավորել ոչ մեկի համար: Տիկին Նաիրա Զոհրաբյանը ստում է, թե մեր հանձաժողովը հստակ թեմաներ է սահմանել լսումների օրակարգի համար: Մարտի 11-ին հանձնաժողովի նիստին հաստատվել է մի օրակարգ, որտեղ թեմաներ, իհարկե, չկան: Առանց թեմաների լսումների օրակարգը տեղադրվել է ԱԺ կայքում: Լսումներից օրեր առաջ օրակարգն ԱԺ կայքից անհետացավ: Լսումներից օրեր առաջ հանձնաժողովների անդամներին ուղարկվեց նոր օրակարգ, որտեղ հայտնվել էին թեմաներ՝ առանց հանձնաժողովի անդամների հաստատման: Կայքը չթարմացվեց նոր թեմատիկ օրակարգով»,-ընդգծել էր պատգամավորը: Դրան արձագանքել էր Գեւորգ Պետրոսյանը՝ նշելով, որ Նաիրա Զոհրաբյանն ամեն ինչ ճիշտ է արել: