Ֆրանսիայում աճուրդի են դրել Նապոլեոնի գահը
Ֆրանսիայում աճուրդի է դրվել Նապոլեոնի գահը: Աճուրդը տեղի կունենա
ապրիլի 7-ին Ֆոնտենբլոյում՝ Ֆրանսիայի միապետների պատմական նստավայրում,
որտեղ 1814 թվականի գարնանը գահից հրաժարված կայսրը հրաժեշտ տվեց իր
գվարդիային։
Մինչ այժմ համարվում էր, թե Նապոլեոնը հինգ գահ է ունեցել: Դրանցից մեկը
գտնվում էր Տյուիլրիի պալատում, մյուսը՝ Սեն Կլու դղյակում, երրորդը՝
Սենատում, որտեղ այն մնացել է մինչ օրս, չորրորդն Օրենսդիր կորպուսում
(այժմ – Ազգային ժողով), հինգերորդը՝ Փարիզի քաղաքապետարանում: Կայսերական
վեցերորդ բազկաթոռի սկզբնական գինն 80 հազար եվրո է: Լոտի պատմությունը
փաստաթղթերով հիմնավորված է:
XIX դարի վերջին ամերիկացի բարեգործ Մայքլ Հենրի դե Յանգը Նապոլեոնի այդ գահը նվիրել է Սան Ֆրանցիսկոյի Կերպարվեստի թանգարանին:
Ավելի վաղ Drouot աճուրդային տունը հայտնել է, որ երեք սիրային
նամակներ, որոնք Նապոլեոն Բոնապարտն ուղարկել է իր կնոջը՝ Ժոզեֆինային,
Ֆրանսիայում կայացած աճուրդում վաճառվել են 510 հազար եվրոյով: Ամենաթանկը
դարձել է այն նամակը, որն ապագա կայսրը գրել է 1796 թվականին իր իտալական
ռազմարշավի ժամանակ: Աճուրդի մասնակիցներնից մեկն այն ձեռք է բերել 221
հազար եվրոյով, հաղորդել է ՏԱՍՍ-ը: