«Ֆլորենս» բենդի բարեգործական համերգը եւ «Ֆլորենս Գարդենի» վերաբացումը՝ Ստեփանակերտում

Արցախի մայրաքաղաք Ստեփանակերտում ապրիլի 5-ին «Ֆլորենս» բենդը հանդես եկավ բարեգործական համերգով։ NEWS.am Style-ը ներկա է եղել համերգին եւ զրուցել կազմակերպիչների հետ։

 Բենդի գեղարվեստական ղեկավար, ՀՀ վաստակավոր արտիստ, ջութակահար Վարազդատ Խաչումյանը պատմեց, որ բենդը գործում է 2011 թվականից, ունի 18 անդամ (16 երաժիշտներ, հնչունային ռեժիսոր եւ լուսային էֆեկտները կարգավորող մասնագետ), երգացանկը բազմազան է՝ ժողովրդականից մինչեւ դասական ու ռոք։ Բարեգործական համերգը, գեղարվեստական ղեկավարի խոսքով, Արցախի մշակույթի նախարարության եւ «Ֆլորենս» ռեստորանային ցանցի համատեղ նախաձեռնությունն է։ Նրա խոսքով՝ սա առաջինը չէ, նախկինում էլ են շատ բարեգործական համերգներով հանդես եկել թե՛ Երեւանում, թե՛ մարզերում։ «Արցախ եկել էինք երկու նպատակով՝ բարեգործական համարգ տալու մշակույթի տանը եւ ցանկանում էինք զորամասերից մեկում համերգով հանդես գալ, սակայն տեխնիկական պատճառներով հետաձգվեց, Պաշտպանության նախարարությունից մեզ միայն երեկ թույլատրեցին, իսկ մենք արդեն ճանապարհին էինք։ Առաջիկայում սակայն կիրագործենք, կնվագենք զինվորների համար»,- ասաց Վարազդատ Խաչումյանը։

 Երեւանում գործող «Ֆլորենս» ռեստորանային համալիրի գլխավոր տնօրեն Մայ Անուշավանյանը նշեց, որ նախատեսել են բարեգործական համարգների շարք, իսկ Արցախը ծրագրի մեկնարկն էր․ «Նախատեսում ենք նաեւ համերգներ ապրիլի 7-ին՝ Գյումրիում, որտեղ կկայանա նաեւ «Ֆլորենս» ռեստորանի բացումը, ապա համերգը կշարունակենք Երեւանում»։ Նա հստակեցրեց, որ Ստեփանակերտում գործող «Ֆլորենս Գարդենը» իր տարեկան հասույթը տրամադրում է Արցախում տարբեր բարեգործական ծրագրերի, ինչպես նաեւ շինարարական նախագծերի։ «Կարապետյան ընտանիքը որեւէ բիզնես շահ չունի Արցախի «Ֆլորենս Գարդեն» եւ Գյումրիի «Ֆլորենս» ռեստորաններից»։ Մայ Անուշավանյանի փոխանցմամբ՝ համերգի ամբողջ հասույթը ուղղվելու է Արցախի մշակույթի նախարարության ծրագրերից մեկի իրականացմանը։

 Բենդի մենակատարներից Հովհաննես Բաբուխանյանը ընդգծեց՝ մեկ տարի է համագործակցում բենդի հետ, բայց իր համար նկատելի են բենդի երկու առանձնահատկություն, որի պատճառվ էլ ինքն հենց այդ բենդում է հանդես գալիս․ «Մարզերում եւ Երեւանում բենդը հանդես է գալիս տարբեր բարեգործական համերգներով, բացի այդ ակնհայտ է ոճային տարբերությունը, քանի որ ծրագրում մենք ունենք հայ կոմպոզիտորների, աշուղների երգերից մինչեւ Բոչչելի։ Յուրաանչյուրը կարող է գտնել իր նախընտրած ոճը»։ Նույն օրը կայացավ նաեւ «Ֆլորենս Գարդեն» ռեստորանի վերաբացումը, որն առանձնանում է իր շքեղ ինտերյերով եւ հարուստ ճաշացանկով։

 «Ֆլորենս Գարդենի» տնօրեն Գարիկ Հովհաննիսյանը շեշտեց, որ վերաբացումը նպատակ է ունեցել նոր թարմություն մտցնել ռեստորանում․ «Որակակակն ավելի նոր մակարդակ դուրս գալու նպատակ ունեինք սպասարկման եւ խոհանոցի մասով, թարմություն ենք ցանկացել մտցնել»։ Տնօրենի խոսքով՝ իրենց նպատակն է, որ «Ֆլորենս Գարդենը» Արցախում դառնա խորհրդանշանական վայր զբոսաշրջիկների եւ տեղի բնակիչների համար։ Նա նաեւ շեշտեց՝ ռեստորանի շնորհիվ լուծվել է շուրջ 50 հոգու զբաղվածության խնդիրը։ «Այս հաստատության միջոցով լուծվել է մոտ 50 մարդու զբաղվածության խնդիր, մոտ ապագայում թիվը կկրկնապատկվի։ Շեշտը դնում ենք Արցախում բնակվողների վրա, որպեսզի կարողանանք օգտակար լինել արցախցուն»,-եզրափակեց նա։