Կառավարությունը կաջակցի «Փոքր և միջին «Խելացի» անասնաշենքերի կառուցմանն ու վերակառուցմանը
Կառավարությունն այսօր ընդունեց «Փոքր և միջին «Խելացի» անասնաշենքերի կառուցման կամ վերակառուցման և դրանց տեխնոլոգիական ապահովման պետական աջակցության ծրագիրը հաստատելու մասին» որոշումը: Նախագծում նշված է, որ այս կարգավորման նպատակն է` փոքր և միջին «Խելացի» անասնաշենքերի կառուցման կամ վերակառուցման և դրանց տեխնոլոգիական ապահովման պետական աջակցութան միջոցով բարելավել կենդանիների պահվածքի պայմանները` արդյունքում բարձրացնելով կենդանիների մթերատվության ցուցանիշները:
Ծրագրի իրականացումից ակնկալվում են հետևյալ արդյունքները.
Կզարգանան հանրապետությունում փոքր և միջին տավարաբուծական տնտեսությունները՝ կկառուցվի կամ կվերակառուցվի շուրջ 230 անասնաշենք,
Կներդրվեն տավարաբուծության վարման արդիական տեխնոլոգիաներ,
Կենդանիների պահվածքի համար կստեղծվեն բարենպաստ պայմաններ,
Կբարձրանա մեկ գլուխ կովի հաշվով կաթնատվության մակարդակը՝ մինչև 3500-4000 կգ,
Կավելանա անասնագլխաքանակը,
Կիջեցվի կաթի ինքնարժեքը, կավելանան արտադրության ծավալները,
Կբարելավվեն կաթի որակական հատկանիշները,
Կավելանան տնտեսավարողների եկամուտները, կբարձրանա մրցունակության մակարդակը,
Կբարձրանան տնտեսավարողների մասնագիտական կարողությունները,
Ծրագրի իրականացման արդյունքում ստեղծված տնտեսությունները կարող են օրինակ ծառայել ֆերմերների լայն շերտերի համար տավարաբուծության արդի մոտեցումներին ծանոթանալու առումով, ինչպես նաև ուսումնական բազա՝ ուսանողների համար։
Անասնաշենքերի կառուցման, վերակառուցման և տեխնոլոգիական ապահովման համար տրամադրվում է փոխհատուցում՝ առնվազն 5 մլն դրամի չափով:
«Այսինքն՝ այդ վարկը վերցնել-տանել, ծախսել անասնագոմ կառուցելու վրա, նախատեսվող կանխիկի կեսը ստանալ նախագծի 50 տոկոսը կառուցելուց հետո՞, ճի՞շտ եմ հասկանում»,- հետաքրքրվեց ՀՀ վարչապետ Նիկոլ Փաշինյանը:
ՀՀ գյուղատնտեսության նախարարի պարտականություններն իրականացնող Գեղամ Գևորգյանը հայտնեց, որ ծրագիրը երկու փուլից է բաղկացած:
«Մենք ասում ենք՝ հենց շնեքը կառուցեցիր, 5 մլն-ի կեսը տալիս ենք, հենց սկսեցիր լամպերը դնել և այլն, մնացածն ենք տալիս»,- ասաց նա:
Նիկոլ Փաշինյանն արձագանքեց.
«Այսինքն՝ մի քանի շերտերով ուղիղ աջակցություն ենք տալիս գյուղացուն, ապահովում, երաշխավորում ենք, որ նոր տեխնոլոգիաներին համապատասխան արտադրանք, կաթ կստանա, որի պահանջարկն այսօր շուկայում շատ բարձր է, որի մեկ լիտրի մթերման գինը 190 դրամ է: Ամենակարևոր հարցը, որ մենք ստացել ենք քաղաքացիներից՝ արդյո՞ք այս ծրագիրն ամբողջությամբ դիզայն արած է, և որոշումն ընդունելուց հետո քաղաքացին երբ կարող է դիմել և ուր, նաև դիմելու պահին ինչ պայմաններ պետք է նա ապահոված լինի»:
Գևորգյանն ասաց, որ ծրագիրն ամբողջությամբ դիզայն է արված, պատկերված է՝ շենքն ինչպիսին պետք է լինի՝ պատերի չափից մինչև լուսավորություն, ներկայացված է, թե ամեն տիպային անասնագոմ ինչ տեխնոլոգիական ապահովվածություն պիտի ունենա՝ օդափոխիչ, LED լամպ և այլն: Դիմումը, ըստ Գևորգյանի, կարող է էլեկտրոնային լինել, միակ պահանջն է, որ դիմողն ունենա սեփական կամ վարձակալությամբ վերցված հող, որտեղ շենք չկա և հարմար է կառուցման համար: Նա վստահեցրեց՝ դիմողներն արագ արձագանք են ստանալու:
Փաշինյանը նշեց, որ ծրագիրը բավական լավն է, միակ խնդիրն է, որ գյուղացիները կարող են չարձագանքել կամ սպասված չափով չարձագանքել: