Սամվել Ալեքսանյանը ներկայումս ավելի շատ հարկ է վճարել, քան նախկինում. ՊԵԿ նախագահ

Շատ կարեւոր է, որ խոշոր հարկատուների որոշակի վարքագծին փորձում ենք քրեաիրավական գնահատական տալ։ Այս մասին այսօր՝ ապրիլի 3-ին, լրագրողների հետ հանդիպմանն ասաց ՊԵԿ նախագահ Դավիթ Անանյանը։

Լրագրողը հետաքրքրվեց՝ 1000 խոշոր հարկատուներից քանիսի՞ նկատմամբ է
քրեական գործ հարուցվել, որին Անանյանը դժվարացավ պատասխանել. «Ես կարող եմ
այս պահին ասել, թե 1000 խոշոր հարկատուներից քանիսն են իրենց տարեկան
շահութահարկը ներկայացրել։ Այդ թիվը գիտեմ։ Բայց թե քանիսի նկատմամբ ենք
մենք քրեական գործ հարուցել, այդ թիվը մտքումս չեմ պահել, քանի որ չեմ
կարծում, որ դա այս պահին մեզ պետքական է։ Իհարկե, շատ կարեւոր է, որ խոշոր
հարկատուների որոշակի վարքագծին փորձում ես քրեաիրավական գնահատական տալ»։

Հարցին՝ նախկին օլիգարխ պատգամավորներից քանի՞սն են ցանկություն հայտնել
գումար վճարել, որպեսզի խուսափեն քրեական գործերի հարուցումից, ՊԵԿ
նախագահը պատասխանեց. «Թե օլիգարխներից քանիսն են նման ցանկություն
հայտնել, այդպիսի տեղեկություն չունեմ։ Բայց նախ պետք է հասկանանք եւ
բնորոշում տանք, թե ովքեր են օլիգարխները, որովհետեւ կարծում եմ՝ մենք հիմա
օլիգարխ չունենք։ Օլիգարխն այն անձն է, որն իր պաշտոնական դիրքն
օգտագործելով զարտուղի բաներ է անում»։

Լրագրողը պարզաբանեց՝ խոսքը նախկին օլիգարխների մասին է, որին նա
արձագանքեց. «Եկեք դուք նախկին օլիգարխների ցանկը տվեք, ես ասեմ՝ ով, ինչ
վարքագիծ է դրսեւորել»։

Նկատառմանը, թե մամուլում խոսվում է Արտակ Սարգսյանի եւ Սամվել
Ալեքսանյանի մասին, Անանյանը ասաց. «Իրենց գործունեությունը ինչպես
նախկինում, համենայնդեպս ոչ վաղ անցյալում, նաեւ հիմա նույն
շրջանառությունն ունեն, եւ ՍԱՍ սուպերմարկետները ՀԴՄ տվող առաջամարտիկներից
մեկն են։ Եթե ձեզ հետաքրքրում է Սամվել Ալեքսանյանի բիզնեսները, ապա
հավաքական առումով իրենք ավելի շատ հարկ են վճարել, քան նախորդ
ժամանակաշրջաններում»։