Ինչպիսի՞ն պետք է լինի ընտանիքում բռնության ենթարկվածի համար ապաստարանը. Կառավարությունը սահմանեց պայմանները
Կառավարությունն իր այսօրվա՝ մարտի 29-ի նիստում որոշում կայացրեց եւ սահմանեց «Ընտանիքում բռնության ենթարկվածների ապաստարաններին և դրանց անձնակազմին ներկայացվող պահանջները», «Ընտանիքում բռնության ենթարկվածների համար նախատեսված ապաստարանների ֆինանսավորման պայմանագրի օրինակելի ձևը»: Հարցը ներկայացրեց ՀՀ աշխատանքի եւ սոցիալական հարցերի նախարար Զարուհի Բաթոյանը, ով նշեց, որ այս որոշմամբ կարգավորվում են ընտանիքում բռնության ենթարկվածների ապաստարաններին և դրանց անձնակազմին ներկայացվող պահանջները: Նրա խոսքով, ընտանիքում բռնության ենթարկվածներին՝ ապաստարանով ապահովելու նպատակն այդ անձանց անհատույց ժամանակավոր կացարանով, անվտանգ միջավայրով ապահովելը, ինչպես նաև «Սոցիալական աջակցության մասին» օրենքով և սույն կարգով սահմանված սոցիալական այլ ծառայությունների տրամադրումն է:
Ապաստարանը պետք է ապահովված լինի ՀՀ օրենսդրությամբ սահմանված պահանջները բավարարող՝ կոմունալ պայմաններով, սանիտարահիգիենիկ և հակահրդեհային անվտանգության անհրաժեշտ պայմաններով, երեխաների ապրելու, խնամքի և դասապատրաստման համար անհրաժեշտ պայմաններով: Ապաստարանը պետք է ունենա ընտանիքում բռնության ենթարկվածների խնամքի տակ եղող երեխաների դասապատրաստման համար անհրաժեշտ կահույքով և պարագաներով հագեցած առնվազն մեկ սենյակ, ներքին կարգապահական կանոններ, որը հաստատում է ապաստարանի ծառայություն մատուցող կազմակերպության ղեկավարը, բոլոր անհրաժեշտ պայմանները ընտանիքում բռնության ենթարկվածների շուրջօրյա անվտանգությունն ապահովելու համար, հաշմանդամություն ունեցող անձանց կարիքների համար հարմարեցված ու մատչելի միջավայր։ Ապաստարանը պետք է գործի շուրջօրյա և ապահովի ընտանիքում բռնության ենթարկվածների, անհրաժեշտության դեպքում իրենց խնամքի տակ եղող անձանց տեղավորումը: Բաթոյանը նշեց, որ այս պահին գործում է միայն երկու ապաստարան ՀԿ-ների կողմից. «Ցավոք կառավարությունը դեռ որեւէ ֆինանսական աջակցություն չի տրամադրում: Անկախ նրանից, թե ում է պատկանում ապաստարանը, այն պետք է բավարարի ներկայացվող նվազագույն պահանջներին»: