Կառավարությունը եթե գտնում է, որ «Նաիրիտը» պիտի աշխատի, ինչու ոչինչ չի անում. Նաիրիտցիները կրկին բողոքում են
Կառավարության դիմաց այսօր՝ մարտի 28-ին, բողոքի ցույց էին անում «Նաիրիտ» գործարանի նախկին աշխատակիցները։
«Մենք արդեն 4-5 տարի պայքարում ենք «Նաիրիտ» գործարանի վերագործարկման համար։ Կա ներդրող, որը խնդրում է նշել պայմանները, որի դիմաց պատրաստ են «Նաիրիտ» գործարանը տալ իրեն։ Երբ մենք հանդիպում ենք կառավարության ներկայացուցիչների հետ, ասում են «Նաիրիտը» միանշանակ պիտի աշխատի, բայց գործարանում ամեն օր տեղի է ունենում գույքի օտարում։ Եթե մեր կառավարությունը գտնում է, որ «Նաիրիտը» պիտի աշխատի, բայց ոչինչ չի անում, մի քանի ամիս հետո «Նաիրիտը» կհավասարվի հողին։ Ներդրողին կառավարությունից էլ ասում են՝ թող ներկայացնեն բանկային երաշխիք»,–նշեցցուցարարներից մեկը։
Նաիրիտցիների խոսքով՝ գործարանում աուդիտ է արվել, կա ներդրող, գործարանը պատրաստ է 60-70 տոկոսով աշխատելու։
Ակցիայի մասնակիցների հետ հանդիպեց փոխվարչապետի գրասենյակի ղեկավար Վարագ Սիսեռյանը։ Հանդիպումից հետո նաիրիտցիները հայտնեցին, որ որոշ թղթեր են ուզել եւ ոչ մի խոսք չի եղել բանկային երաշխիքի մասին։ Նրանց խոսքով՝ ասել են, որ պետական պատվերով կհրավիրեն ներդրողներին եւ կքննարկեն հետագա քայլերի մասին։