ՀԲ-ի եւ ԵՄ-ի կողմից մշակված հարցաշարը թարգմանության փուլում է եւ հաջորդ շաբաթ ՀՀ-ում կմեկնարկի պիլոտային ծրագիրը

Արեւելյան գործընկերության երկրներում արդարադատության արդյունավետությունը բարելավելու, դատական իշխանության համակարգում սոցիոլոգիական հարցումներ իրականացնելու եւ նմանաբնույթ մի շարք հարցադրումների քննարկման նպատակով Համաշխարհային բանկի պատվիրակությունն այսօր հանդիպեց Բարձրագույն դատական խորհրդի ներկայացուցիչների հետ:

Հանդիպմանը մասնակցում էին Բարձրագույն դատական խորհրդի նախագահի պաշտոնակատար Գեւորգ Դանիելյանը, Համաշխարհային բանկի արդարադատության բարեփոխումների բաժնի մասնագետ Եվա Միլիսը, արդարադատության բարեփոխումների փորձագետ Մարիա Մատիչը։

Պարոն Գեւորգ Դանիելյանը, ողջունելով հյուրերին, շնորհակալություն հայտնեց Բարձրագույն դատական խորհրդի հանդեպ դրսեւորած գործնական փոխհարաբերության համար, ապա ընդգծեց, որ «Արդարադատության վերաբերյալ հարցման» ծրագրի շրջանակում իրականացվելիք հարցումներն արժեքավոր են այնքանով, որքանով այսօր երկրում քաղաքական իրողությունների համատեքստում կարեւոր է պարզել, թե ինչպիսին է վստահությունը դատական իշխանության նկատմամբ, ինչ եղանակներով է հնարավոր շտկումներ իրականացնել։ Նրա խոսքով՝ դատական իշխանությունն ամենախոցելի ճյուղն է, թեեւ ներկայումս նկատելի են որոշակի դրական տեղաշարժեր։

Կարեւոր գործոն էր հատկապես այն, որ երկրի վարչապետը պաշտոնապես ընդգծեց, որ դատական իշխանության անկախությունն իրենց համար խիստ կարեւոր է, միանշանակ ձեռնպահ են մնալու որեւէ միջամտությունից եւ քայլեր են ձեռնարկելու դատավորների անկախության, այդ թվում՝ սոցիալական եւ նյութական պայմանների երաշխավորման համար։

Համաշխարհային բանկի արդարադատության բարեփոխումների բաժնի մասնագետ Եվա Միլիսը եւս նկատեց, որ հարցումների նպատակն է պարզել դատաիրավական համակարգի արդյունավետությունը, արդարադատության մատչելիությունը եւ որակը, բարեվարքությունը եւ մի շարք այլ հարցադրումներ: Համաշխարհային բանկի եւ ԵՄ-ի կողմից մշակված հարցաշարն այժմ թարգմանության փուլում է, եւ հաջորդ շաբաթ կմեկնարկի պիլոտային ծրագիրը։

Հետադարձ կապի շնորհիվ էլ ակնկալում են հստակեցնել հարցաշարում առկա հասկացությունների թարգմանության եւ ճիշտ մեկնաբանման հետ կապված հարցերը, որոնք կքննարկեն մայիսին կայանալիք աշխատաժողովի ժամանակ։ Ներկայացվեց նաեւ գործառութային վերլուծության ժամանակ կիրառվելիք մեթոդաբանությունը։

Թիրախային խմբում դատավորներն են, դատախազները, դատարանի եւ դատախազության աշխատակիցները, փաստաբանները, քաղաքացիները եւ իրավաբանական անձինք (ինչպես նրանք, ովքեր երբեւէ առնչություն են ունեցել դատաիրավական համակարգի հետ, այնպես էլ նրանք, որոնք այդպիսի որեւէ առնչություն չեն ունեցել): Պարոն Գեւորգ Դանիելյանն առաջարկեց ներառել կարգապահական պատասխանատվության ենթարկված եւ իրենց դիմումի համաձայն համակարգից դուրս եկած դատավորներին եւս ներառել հիշյալ խմբում։

Եվա Միլսի խոսքով՝ բուն հարցումը կանցկացվի սեպտեմբերին, իսկ նոյեմբերին կներկայացվեն առաջին արդյունքները՝ թվային ցուցանիշների եւ գրաֆիկաների տեսքով։

Միաժամանակ, պարոն Գեւորգ Դանիելյանը, ներկայացնելով դատական համակարգում էլեկտրոնային արդարադատության եւ էլեկտրոնային շրջանառության նոր համակարգի անցման ծրագրային ուղենիշները, առաջարկեց քննարկման առարկա դարձնել նաեւ այդ հարցադրումներով համագործակցության վեկտորները: Կողմերը պայմանավորվեցին այդ առնչությամբ համապատասխան տեղեկատվություն տրամադրել Համաշխարհային բանկին, որտեղ այն սեղմ ժամկետում կդառնա համակողմանի քննարկման նյութ: