Վիլնյուսում դատարանը ԽՍՀՄ պաշտպանության նախկին նախարար Դմիտրի Յազովին հեռակա 10 տավա բանտարկության է դատապարտել

Վիլնյուսի շրջանային դատարանը ԽՍՀՄ պաշտպանության նախկին նախարար Դմիտրի Յազովին հեռակա 10 տավա ազատազրկման է դատապարտել: Նա 1991 թվականի հունվարի 13-ի իրադարձությունների գործով մեղավոր է ճանաչվել ռազմական հանցագործությունների եւ մարդկության դեմ կատարված հանցագործությունների մեջ, հայտնում է «Մեդուզան»:

Մեղադրող կողմի վարկածով՝ 1990 թվականի վերջին Յազովը հանձնարարել է պատրաստել Լիտվան ԽՍՀՄ կազմ վերադարձնելու ծրագիր եւ կազմել գրավելու ենթակա ռազմավարական օբյեկտների ցանկը: Նրա ծրագրի իրականացման հետեւանքով 1991 թվականի հունվարին «Խորհրդային Միության կողմից Լիտվայում ագրեսիա է սկսվել եւ զինված հակամարտություն»:

Գործով հեռակա դատապարտվել է նաեւ ՊԱԿ նախկին սպա Միխայիլ Գոլովատովը՝ նա դատապարտվել է 12 տարվա բանտարկության: Լիտվայի դեմ «իրականացված խորհրդային ագրեսիայի» մեղադրանք է ներկայացվել ընդհանուր Ռուսաստանի, Բելառուսի եւ Ուկրաինայի 67 քաղաքացու: Դատարանի առջեւ են կանգնել ՌԴ միայն 2 քաղաքացի, մնացյալը՝ հեռակա:

ՌԴ պաշտպանության նախարարության կայքի համաձայն՝ 1987 թվականի մայիսից 1991-ի օգոստոս Յազովը եղել է ԽՍՀՄ պաշտպանության նախարարը: Այս ժամանակահատվածում նրա ղեկավարությամբ մեծ աշխատանք է կատարվել Զինված ուժերի մարտունակության բարձրացման ուղղությամբ, իրականացվել է Աֆղանստանի տարածքից խորհրդային զորքերի կազմակերպված դուրսբերումը: 1990 թվականին Յազովին շնորհվել է Խորհրդային Միության մարշալի կոչում:

Յազովը պարգեւատրվել է Լենինի 2 շքանշանով, Հոկտեմբերյան հեղափոխության շքանշանով, Կարմիր դրոշի շքանշանով, ԽՍՀՄ Զինված ուժերում Հայրենիքին ծառայության համար» 3-րդ աստիճանի շքանշանով, ԽՍՀՄ մեդալներով, արտասահմանյան պետությունների շքանշաններով եւ մեդալներով:

1991 թվականին միացել է ստեղծվող Արտակարգ իրավիճակների պետական կոմիտեին եւ առաջին օրից մտել դրա կազմի մեջ, նրա հրամանով Մոսկվա են մտցվել տանկեր եւ ծանր ռազմական տեխնիկա: