Հայաստանում տեսչական մարմինների թիվը 21-ից կհասցվի 6-ի. Հայկ Այվազյան
Հայաստանում տեսչական մարմինների թիվը 21-ից կհասցվի 6-ի։ Այս մասին մարտի 27-ին լրագրողների հետ հանդիպմանն ասել է Հայաստանի վարչապետի աշխատակազմի Տեսչական մարմինների աշխատանքի համակարգման գրասենյակի ղեկավար Հայկ Այվազյանը։
Նրա խոսքով՝ տեսչական մարմինների կրճատումը ոլորտում դեռեւս 2009-ին սկսված բարեփոխումների արդյունքն է։ «Օպտիմալացումը, որի արդյունքում կրճատվել են ե՛ւ տեսչական մարմինները, ե՛ւ աշխատակիցների թիվը, բարեփոխման փուլերից մեկն է։ Իրականացվող բարեփոխումների արդյունավետության ամբողջական գնահատման համար հարկավոր է համալիր վերլուծություն, բայց համոզվածությամբ կարելի է ասել, որ օպտիմալացման նպատակը քիչ ծախսերով անհրաժեշտ աշխատանքների կատարումն է։ Վերափոխումներն, անշուշտ, ուղղված են երեք սուբյեկտների արդյունավետության բարձրացմանը՝ պետական ապարատ, սպառող եւ բիզնես»,- ասել է նա։
Ինչպես տեղեկացրել է պաշտոնյան, այս տարի կիրականացվեն տեսչական մարմինների աշխատանքի գնահատման մեխանիզմների ներդրման աշխատանքներ, ինչպես նաեւ կմշակվեն իրավական ակտեր, որոնք անհրաժեշտ են ոլորտի առողջացման համար։
Նա հավաստիացրել է, որ բիզնեսի համար կգործեն այնպիսի նորմեր, որոնք նրան որոշակի առավելություններ կտան նախկինի համեմատ։ «Նախ՝ կհրապարակվի ստուգումների ցանկը, որոնք նախատեսված են ընթացիկ տարում։ Բացի այդ, կներդրվի էլեկտրոնային համակարգ, ինչը կթեթեւացնի նաեւ տեսչության աշխատանքը»,- պարզաբանել է պաշտոնյան։
Հայկ Այվազյանը հավելել է, որ բարեփոխումների գլխավոր տարբերակիչ առանձնահատկությունը կոռուպցիոն ռիսկերը նվազեցնելու ձգտումն է, որոնք եղել են նախկին իշխանությունների օրոք։ «Եթե ստուգումը տեսչական մարմնի համար ինքնանպատակ է, ապա դա արդեն կոռուպցիոն ռիսկ է պարունակում։ Նման երեւույթներ նախկին իշխանությունների ժամանակ նկատվել են»,- ամփոփել է Հայաստանի վարչապետի աշխատակազմի Տեսչական մարմինների աշխատանքի համակարգման գրասենյակի ղեկավարը։