Բաժնետիրական ընկերությունների մասին օրենսդրությունը խորքային փոփոխությունների կարիք ունի. Թունյան

Ազգային ժողովում քննարկվում է ընկերությունների բաժնեմասերի գնումների սահմանափակումների ու այլ գործիքների կիրառումը։ Նախագիծը ներկայացրած տնտեսական զարգացման և ներդրումների նախարար Տիգրան Խաչատրյանի խոսքով՝ դրանք կբարձրացնեն ընկերություններում որոշումների ընդունման թափանցիկությունը։

«Բաժնետիրական ընկերությունների մասին օրենսդրությունը խորքային փոփոխությունների կարիք ունի: Բայց, եկեք համաձայնեք, որ այս փոքր փաթեթով բոլոր խնդիրները միանգամից լուծել անհնար էր: Լուծվում է մեկ պարզ խնդիր՝ փոքր բաժնետերերի հարցը և հիմնականում պայմանավորված է Doing Business զեկույցում մեր դիրքերը բարելավելով: Չեմ ասում, որ Doing Business-ը պետք է ինքնանպատակ լինի, և բարելավելը պետք է մեր գերնպատակը լինի, միգուցե դա մեզ ընդհանրապես ոչ մի բան չտա, բայց եթե կարելի է խնդիր լուծել ու դրանով զեկույցում առաջ գնալ, ավելի լավ է դա անել, քան չանել»,- օրինագծի քննարկման ժամանակ ասել է ԱԺ տնտեսական հարցերի մշտական հանձնաժողովի նախագահ Բաբկեն Թունյանը:

Ըստ ԱԺ տնտեսական հարցերի մշտական հանձնաժողովի նախագահի՝ նախագիծը երբ հանձնաժողովում քննարկվել է, ընդդիմության ներկայացուցիչներն էլ են միաձայն կողմ քվեարկել: Կառավարությունն առաջարկել է 24 ժամյա ռեժիմում երկրորդ ընթերցում կազմակերպել, հանձնաժողովը համաձայնություն չի տվել մինչև երկրորդ ընթերցումը ժամանակ ունենալու ու խմբագրական բնույթի ճշգրտումներ կատարելու համար:

«Մեկ խնդրանք՝ մինչև օրենքը հանձնաժողովի նիստին քվեարկության դրվելը ժամանակ կա, էդ ընթացքում կարելի է առաջարկություններ ներկայացնել, մենք որևէ առաջարկություն չենք ստացել, եթե այդ առաջարկությունները ժամանակին ներկայացված լինեին, այսօր, թեկուզ այս փոքր օրենքը, կարող էր ավելի հղկուն տեսք ունենալ»,- ասել է Բաբկեն Թունյանը`կոչ անելով կողմ քվեարկել: Նա վստահեցրել է, որ շտկումները մինչև երկրորդ ընթերցումը կանեն: