Հայաստանում կանանց մասնակցությունը քաղաքական գործընթացներում դրական տեղաշարժ է արձանագրել. Շվեդ նախարար
Աշխատանքի եւ սոցիալական հարցերի նախարարությունը կառավարության կողմից իրականացվող աշխատանքների շրջանակում նախատեսում է մի շարք ոլորտներում նոր ռազմավարությունների մշակում, նոր ծրագրերի իրականացում: Այս մասին ասել է ՀՀ Աշխատանքի եւ սոցիալական հարցերի նախարար Զարուհի Բաթոյանը՝ Շվեդիայի միջազգային համագործակցության զարգացման նախարար Փիթեր Էրիքսոնի հետ հանդիպման ընթացքում։
Նախարարությունից NEWS.am-ին հայտնում են, որ Բաթոյանը նշել է, որ իրենց համար շատ կարեւոր են մարդու իրավունքների վրա հիմնված մոտեցումները՝ երեխաների, հաշմանդամություն ունեցող անձնանց, կանանց, տարեցներին վերաբերող քաղաքականության մշակման եւ իրականացման գործում:
Ողջունելով հյուրերին՝ նախարարը նշել է, որ հայ-շվեդական առաջիկա համագործակցության համար խորհրդանշական է, որ հանդիպումը կայանում է Թումո կենտրոնում, որտեղ նորարարական, ստեղծարար շունչ կա։
«Մենք բաց ենք համագործակցության համար եւ ունենք հստակ ծրագրեր, ռազմավարություններ, որոնք պլանավորում ենք մշակել, այդ թվում նաեւ նախարարության կառուցվածքային փոփոխություններ՝ ի նպաստ այդ ռազմավարությունների իրականացման»,- հավելել է նախարարը՝ շնորհակալություն հայտնելով տարիներ առաջ նախարարության հետ ունեցած համագործակցության համար՝ մասնավորապես անդրադառնալով այն ներդրմանը, որն ունեցել է Շվեդիայի միջազգային զարգացման գործակալությունը (SIDA) հայաստանյան աշխատաշուկայի ոլորտում իրականացված բարեփոխումների գործում։ ՀՀ աշխատանքի եւ սոցիալական հարցերի նախարարի տեղայալ Արման Ուդումյանն էլ հավելել է, որ շվեդալիտվական կոնսուրցիումի եւ Զբաղվածության պետական գործակալության միջեւ տարիներ շարունակ արդյունավետ համագործակցություն է եղել, եւ ներկայում աշխատաշուկայում եղած ակտիվ 12-13 ծրագրի հիմքում հենց այն գաղափարներն են դրված, որոնք այդ համագործակցության եւ աջակցության ծրագրի շրջանակում են ստեղծվել.«Շվեդիան աշխարհում հայտնի է իր բարեկեցության ուժեղ մոդելով, եւ այս առումով նույնպես հնարավոր ապագա համագործակցությունն ի շահ երկու երկրների կլինի»,- ասել է նախարարի տեղակալը։
Շվեդիայի միջազգային համագործակցության զարգացման հարցերի նախարարը ողջունել է մեր երկրում կատարվող փոփոխությունները, մասնավորապես ժողովրդավարության ամրապնդման, քաղաքացիական հասարակության զարգացման ուղղությամբ: Նա նշել է, որ Շվեդիան, որպես 10 տարի առաջ «Արեւելյան գործընկերության» ծրագիրը նախաձեռնած երկրներից մեկը, պատրաստ է խորացնել կապերը Հայաստանի հետ տարբեր բնագավառներում, այդ թվում՝ գենդերային հավասարության, մարդկանց իրավունքների պաշտպանության եւ այլ հարցերում:
Հանդիպման ընթացքում նախարար Զարուհի Բաթոյանը խոսել է նաեւ այն խնդիրների մասին, որոնք առկա են ոլորտում եւ որոնց ուղղությամբ արդեն իսկ ծրագրեր են մշակվում եւ իրականացվում։
Շվեդական պատվիրակության անդամները ողջունել են այն փաստը, որ Հայաստանում կանանց մասնակցությունը քաղաքականության եւ որոշումների կայացման գործընթացներում դրական տեղաշարժ է արձանագրել, եւ հայաստանյան բարձրաստիճան պաշտոնյաները կարեւորում են կանանց մասնակցայնության հարցը։ Նրանք նաեւ ուրախությամբ լսել են այն ծրագրերի մասին, որոնք իրականացնում է նախարարությունը կանանց զբաղվածության ապահովման, աշխատող մայրերին երեխայի խնամքի համար աջակցության եւ այլ հարցերում։