Ինչո՞ւ որոշ դեպքերում հարազատ եղբայրները չեն կարող ծառայել նույն վայրում․ քննարկում կառավարությունում
Պաշտպանության նախարարությունը կառավարություն է ներկայացրել օրենքի նախագիծ, որով կարգավորումներ են տրվում զինվորական ծառայության կազմակերպման հարցերին, որոնցից մեկն էլ վերաբերում է եղբայրների՝ նույն զորամասում ծառայելու սահմանափակումներին։
Այս կարգավորմամբ սահմանվում է, որ եթե երկու (և ավելի) հարազատ եղբայր միանգամից մեկնում են ծառայության, ապա զորամասի որոշման վիճակահանությանը մասնակցում է նրանցից միայն մեկը, և երկուսն էլ գնում են նույն զորամաս։
Բայց եթե եղբայրներից մեկն արդեն ծառայության է որևէ զորամասում, որտեղ զինծառայողի համար սահմանված են հատուկ պահանջներ (պատվո պահակախումբ, հատուկ նշանակության ստորաբաժանում և այլն), ապա եթե նոր ծառայության մեկնող մյուս եղբայրը չի բավարարում այդ պահանջներին, ապա չի կարող զորակոչվել նույն զորամաս։
Կառավարությունում այս հարցի ներկայացման ժամանակ պաշտպանության նախարար Դավիթ Տոնոյանն այս ամենը բացատրեց՝ ի պատասխան ՏԿՏՏ նախարար Հակոբ Արշակյանի հարցի, և այդ ընթացքում պարզվեց, որ Արշակյանը երկու եղբայրների հետ ծառայել է նույն զորամասում։
Հարցի քննարկմանը միջամտեց նաև մարդու իրավունքների պաշտպան Արման Թաթոյանն ու ասաց, որ այս նախագիծը շատ բան է կարգավորում, քանի որ մինչ այս եղած կարգավորումներում անհստակություններ կային։