Այս պահին ԵԱՏՄ բանավեճերի ամենաթեժ թեման գազի փոխադրման գինն է․ Տիգրան Սարգսյան
Անկախությունից հետո հետխորհրդային երկրները բռնել են տարբեր ուղիներ, և այժմ կատարվում է ազգային օրենսդրությունների համաձայնեցում։ Այս պահին ԵԱՏՄ ներսում բանավեճերի ամենաթեժ թեման գազի փոխադրման հարցն է, դրա գնագոյացումը։ Այս մասին ռուսական Forbes-ին հայտնել է ԵՏՀ նախագահ Տիգրան Սարգսյանը։
Նրա խոսքով՝ կա երկու տեսակետ․ Բելառուսինը, ըստ որի՝ տարանցման գինը բոլորի համար պետք է լինի նույնը, և Ռուսաստանինը, ըստ որի՝ այն պետք է լինի ոչ դիսկրիմինացիոն։ Ըստ Սարգսյանի՝ խնդիրն այն է, որ գազի մատակարարաման ենթակառուցվածքների խնդիր կա, և գազը տարբեր տեղեր հասնում է տարբեր գնով, ինչի պարագայում պետք է լինի գնի գոյացման հասկանալի ու տրամաբանական տարբերակ։
«Հարցի գինը շատ բարձր է, դրա պատճառով էլ բանավեճերն էլ սուր են»,- ասել է Սարգսյանը։
Երկրորդ ամենաթեժ խնդիրը, ըստ նրա, ֆիտոսանիտարական քննությունների խնդիրն է, որտեղ օրենսդրությունները արդեն ներդաշնակ են, բայց գործարարները դեռ հին կանոններով են շարժվում։ Երբ որևէ երկրից մյուս երկիր որևէ ապրանքի ներմուծումն արգելվում է, մի կողմը, ըստ Սարգսյանի, կարծում է, որ արգելքը հիմնավոր է, մյուսը կարծում է՝ ոչ։