ՊԵԿ քննչական վարչությունում քննվող քրեական գործերով վերականգնվել է 8.5 միլիարդ դրամ
ՊԵԿ վարչական շենքում տեղի է ունեցել ՊԵԿ նախագահի տեղակալ Ռուստամ Բադասյանի հանդիպումը լրագրողների հետ: Թեման ՊԵԿ քննչական վարչությունում քննվող քրեական գործերով վերականգնված գումարները, պետությանը պատճառված վնասի նախնական հաշվարկները, ինչպես նաև հարկային վարչարարության բարեփոխումները, օրենսդրական նախաձեռնություններն էին:
«2016, 2017, 2018 թվականների քրեական գործերի շրջանակներում պետությանը պատճառված վնասի նախնական հաշվարկները. 2016 թվականին 86 քրեական գործի շրջանակում մոտ 5 միլիարդ 450 միլիոնի մասին է խոսքը գնում, 2017 թվականին 57 քրեական գործով 1 միլիարդ 830 միլիոնի մասին է խոսքը, արդեն 2018 թվականին ունենք 134 քրեական գործ, որով պետությանը պատճառված վնասի նախնական հաշվարկներով՝ կա 23 միլիարդ և ավելի գումարի պատճառված վնաս:
Ինչ վերաբերում է վերականգնումներին, ապա 2016 թվականին` 4.5 միլիարդ, 2017-ին` 8.4 միլիարդ, 2018-ին՝ 8.5 միլիարդ: 2018 թվականի ցուցանիշը հիմնականում ապահովվել է հունիսից հետո հարուցված կոռուպցիոն բնույթի քրեական գործերով վերականգնումներով, որով առաձին-առանձին մամուլի հրապարակումներով հանդես ենք եկել»,-ասաց Բադասյանը:
Պետությանը պատճառված վնասի մասին խոսելիս Բադասյանն այլ մանրամասներ ներկայացրեց՝ ստվերի մասին պատկերացում կազմելու համար: Հիմնական գումարը՝ մոտ 16 միլիարդ դրամ, գազալիցքավորման գործունեություն իրականացնող տնտեսվարողների շրջանում է:
«Նաև շինարարական գործունեությունն է, «Կարգո» ընկերությունները, որոնք հավաքական բեռների ներմուծմամբ էին զբաղվում, նաև ապահովագրական ընկերությունների մասով ենք առանձնացրել՝ հաշվի առնելով հասարակական հետաքրքրվածությունն այդ ոլորտի նկատմամբ»,-ասաց նա: