ԱՄՀ-ն Հայաստանին կարող է 250 մլն դոլարի ֆինանսավորում տրամադրել՝ բարեփոխումների ծրագրին աջակցելու համար. Fitch

Հայաստանի՝ ԱՄՀ-ի հետ նախատեսված համաձայնագիրը հաստատում է, որ նոր
կառավարության տնտեսական քաղաքականության առաջնահերթությունները
համապատասխանում են մեր սպասելիքներին՝ ֆինանսապես խելամիտ և
բարեփոխումների միտված մոտեցման առնչությամբ:

Այս մասին ասվում է Fitch Ratings միջազգային վարկանշային գործակալության հաղորդագրության մեջ, որում ընդգծվում է, որ այդ քաղաքականությունը կենտրոնանում է կայուն աճի պահպանման, ֆինանսական ամրապնդման և արտաքին խոցելի գործոնների վրա:

«Զգալի տնտեսական խախտումների կամ ֆինանսական համակարգի ապակայունացնող
ճնշումների բացակայությունը և դրամի հարաբերական կայունությունն անցած տարի
տեղի ունեցած իշխանափոխության ընթացքում հնարավոր է դարձել տնտեսական
ինստիտուտների, ինչպես օրինակ՝ Կենտրոնական բանկի անխափան գործունեության
շնորհիվ: Դա հաստատուն մակրոտնտեսական մեկնարկային կետ է ապահովում նոր
կառավարության համար»,- ասվում է հաղորդագրության մեջ:

Ինչպես նշվում է, տնտեսական աճը դանդաղել է 2018-ին, սակայն կայուն է մնացել: Գործակալության մասնագետները տարեկան իրական ՀՆԱ-ի աճը գնահատում են 5 տոկոս, որը ցածր է 2017-ին գրանցված 7.5 տոկոսից:

Ընդգծվում է, որ Ամուլսարի ոսկու հանքավայրի շուրջ իրավիճակի հետ կապված
անորոշության նվազեցման ֆոնին կարող են մեծանալ արտահանման աճը և
օտարերկրյա ներդրումների հեռանկարները:

«Արտաքին պարտքը, ինչպես նաև լարված հարաբերությունները որոշ հարևան
պետությունների հետ հիմնական թույլ կետերն են Հայաստանի B+ վարկանիշում:
Դրական հեռանկարը վարկանիշում առավել կայուն աճ է արտացոլում ֆինանսական
ամրապնդման մեկնարկային կետում, որն, ինչպես ակնկալում ենք, կհանգեցնի
պետական պարտքի աստիճանական նվազման»,- նշում են մասնագետները:

Արժույթի միջազգային հիմնադրամը փետրվարի 26-ին հայտարարել է, որ Հայաստանի հետ հասել է 250 մլն դոլարի եռամյա ֆինանսավորման տրամադրման նախնական
պայմանավորվածության՝ աջակցելու համար նոր կառավարության բարեփոխման
ծրագրերին: ԱՄՀ-ի գործադիր խորհուրդը համաձայնագիրը կքննարկի մայիսին:  

Ինչպես նշվում է, միջազգային ֆինանսական ինստիտուտների և երկկողմ
գործընկերների աջակցությունը բարձրացնում է վստահությունը Հայաստանի
քաղաքականության հանդեպ: