на Русском
Շուշիի Կանաչ ժամ եկեղեցին ավերելով՝ Ադրբեջանը... 
Մայիսի 1-ից տեսանկարահանող կամ լուսանկարահանո... 
Սրտացավություն չկա, մենք միշտ կորցնում ենք, հետո ափսոսում, Խորենացի 13 հասցեում շենքի ճակատը իրենից արժեք էր ներկայացնում. ասուլիս
Այսօր մամուլի ասուլիսին ճարտարապետ Հրաչյա Պողոսյանը և Երևանի նախկին գլխավոր նկարիչ Հաղթանակ Շահումյանն անդրադարձան Երևանի Խորենացի 13 հասցեում գտնվող, նախկին Լուսավորության նախարարության շենքի ճակատային հատվածի քանդմանը։
Հրաչյա Պողոսյանը նշեց, որ Հայաստանում առկա ճարտարապետական խնդիրների մասին բազմիցս բարձրաձայնել են: «Կառուցվածքը և մոտեցումը պետք է փոխվեն, որովհետև ընդունված կառուցվածքը չի աշխատում»,-ասաց նա և նշեց, որ արտասահմանյան փորձը ցույց է տալիս, որ շատ քաղաքներում գլխավոր ճարտարապետ չունեն, նման հաստիք ընդհանրապես գոյություն չունի։
«Այսինքն՝ պետք է աշխատել այնպես անել, որ քաղաքին վերաբերող կարևորագույն խնդիրները կախված չլինեն մեկ մարդու կամքից կամ ճաշակից, դժվար իրավիճակի մեջ է հայտնվում նաև այդ մարդը, քանի որ մեկ մարդուն միշտ էլ հնարավոր է համոզել, կոտրել, շատ վատ բաներ չեմ ասում, որովհետև հիմա դա բացառվում է, հատկապես՝ Արթուր Մեսչյանի պարագայում»,-ասաց նա և նշեց, որ գնալով այս երևույթները կշատանան:
Ըստ նրա` ոչ թե մի անձի կարծիք պետք է լինի, այլ միության, հանրության կարծիք: «Այս շենքի քանդման գործընթացը տեսել եմ սոցիալական ցանցում, շատ եմ զարմացել, վրդովվել, որ Ճարտարապետների միությունն այս հարցում մի կողմի վրա է, և որևէ մեկը նրա կարծիքը չի հարցնում»,-ասաց նա և քանդվող շենքը արժեք համարեց և նշեց, որ այն արտացոլում էր այն ժամանակաշրջանը:
«Սկզբում պետք է նախագիծը լինի, թե ինչ են կառուցելու քանդելուց հետո, նախագիծը պետք է համաձայնեցվի, այնուհետև թույլատրվի կառույցը քանդել։ Այս շենքի դեպքում նման նախագիծ ասպարեզում չկա, մենք չգիտենք, թե տվյալ ճարտարապետն ով է և ինչ է ուզում անել»,-ասաց նա։ Նա նաև վտանգ տեսավ, այդ նախագիծն իր մեջ ներառում է նաև նախկին «Սևան» հյուրանոցի տարածքը և նշեց, որ «Սևան» հյուրանոցի կառուցումը Երևանի կարևորագույն խնդիրներից է:
Երևանի նախկին գլխավոր նկարիչ Հաղթանակ Շահումյանը կարծում է, որ Հայաստանում օրենքները ընտրովի են կիրառում:
«Ցավալիորեն սրտացավություն չկա, մենք միշտ կորցնում ենք, հետո ափսոսում: Ըստ երևույթին, նախաքրիստոնեական մեր ճարտարապետության նկատմամբ նույնպիսի վերաբերմունք ենք ձևավորել, որ չունենք այդ պատմությունը: Օրեցօր քաղաքի պատմություն է կերտվում, եթե մենք անփույթ լինենք, այդպես էլ Երևանը անդեմ մի բան կդառնա: Եղածի վրա պետք է կառուցել, մեր ժողովուրդը իմաստություն ունի` քարը քարի վրա է տուն կառուցում, և դա բոլոր ասպարեզներին է վերաբերում»,-ասաց նա:
Հաղթանակ Շահումյանը նշեց, որ սխալներ եղել են բոլոր ժամանակներում, և մենք այսօր տեսնում ենք նախկին արված սխալները, և ինքներս մասնակից ենք դառնում դրանց: Նա նկատեց, որ Հանրային խորհուրդը, որը պետք է հանրության կարծիքը պարտադրող լինի, լռում է, ավագանին լռում է: Նա նշեց, որ քանդվող հուշարձանը հուշարձանների ցանկից հանել են, ինչի իրավունքը ոչ մեկը չունի:
«Դա հնարավոր չէ նորից վերականգնել, ամեն վարպետ իր ձեռքով տաշել է, հիմա մեքենայով պետք է դնեն հավաքեն, բայց այդ ոգին չի լինի»,-ասաց նա:
