ՔԿՀ-ներում ներկայիս գերխնդիրը կայուն ու կառավարելի իրավիճակ ապահովելն է. Արտյոմ Մխոյանը ներկայացրել է «Աբովյան» ՔԿՀ-ի պետին

Մարտի 5-ին ՀՀ ԱՆ քրեակատարողական ծառայության պետ, արդարադատության գնդապետ Արտյոմ Մխոյանը «Աբովյան» քրեակատարողական հիմնարկում ներկայացրել է պետի ժամանակավոր պաշտոնակատար, արդարադատության գնդապետ Վարուժան Եղիազարյանին: Այս մասին հայտնում են ՔԿԾ հանրային կապերի բաժնից:

Ներկա էին «Աբովյան» քրեակատարողական հիմնարկի պետի տեղակալները, ստորաբաժանումների պետերը, պատասխանատու հերթապահները, ինչպես նաև հիմնարկի նախկին պետ, արդարադատության գնդապետ Գայանե Վարդանյանը:

ՀՀ ԱՆ քրեակատարողական ծառայության պետ, արդարադատության գնդապետ Ա. Մխոյանը նախ շնորհակալական խոսք է ուղղել Գ. Վարդանյանին՝ ընդգծելով նրա դրական և արդյունավետ աշխատանքը ողջ ծառայության, մասնավորապես «Աբովյան» քրեակատարողական հիմնարկում աշխատելու ընթացքում: Այնուհետև շնորհավորելով պետի ժամանակավոր պաշտոնակատար Վ. Եզիազարյանին՝ մաղթել է նրան բեղմնավոր, արդյունավետ և անփորձանք աշխատանք:

Շնորհակալական խոսքով հանդես է եկել Վ. Եղիազարյանը՝ հավաստիացնելով, որ հիմնակի անձնակազմի հետ համատեղ կներդնեն բոլոր հնարավորություններն ու եռանդը՝ իրենց հանդեպ ցուցաբերված վստահությունն արդարացնելու և առկա խնդիրները լուծելու համար:

Դիմելով ներկաներին՝ Ա. Մխոյանը շեշտադրել է հատկապես հստակ ուրվագծված այժմեական այն պահանջները, որոնք դրված են երկրի, այդ թվում նաև Ծառայության առջև: Ըստ Ծառայության պետի՝ համակարգի առաջնային խնդիրը յուրաքանչյուրի կողմից քրեակատարողական ծառայողի արժանապատվության, պատվի, արժեքների պահպանումն է, ինչն էլ իր հերթին պայմանավորված է անհատ ծառայողի անձնական մոտեցումից:

Ա. Մխոյանն անդրադարձել է նաև կոռուպցիային՝ նշելով, որ կոռուպցիա և անօրինականություն են համարվում նաև այն դեպքերը, երբ խախտվում են ծառայողական պարտականությունների շրջանակներն ու կարգապահությունը՝ միևնույն ժամանակ պահանջելով լինել միասնական, համախմբված, միայն համախմբվածության դեպքում կարող են հաղթահարել ծառացած հակասություններն ու անհամաձայնությունները՝ ցանկացած խնդրի համար գտնելով օրինական և տրամաբանական լուծումներ:

Քրեակատարողական հիմնարկներում ներկայիս գերխնդիրը կայուն ու կառավարելի իրավիճակ ապահովելն է, ինչին հասնելու կարևորագույն ճանապարհներից մեկը, ըստ Ծառայության պետի, ծառայողական կուռ կարգապահությունն է, իսկ կոռուպցիայի ցանկացած երևույթի բացահայտման դեպքում անձը կենթարկվի պատասխանատվության: