Microsoft-ի աշխատակիցները ղեկավարությանը կոչ են արել լուծել Պենտագոնի հետ պայմանագիրը
Microsoft-ի մի խումբ աշխատակիցներ ընկերության ղեկավարությանը կոչ են արել լուծել Պենտագոնին ԱՄՆ բանակի համար լրացուցիչ իրականության HoloLens ակնոցների մատակարարման 480 միլիոն դոլարի պայմանագիրը՝ հայտնում է NBC-ն։
Այս պայմանագիրը Microsoft-ը շահել է անցյալ տարվա նոյեմբերին։ Ինչպես տեղեկացվել է նախկինում, ընդհանուր առմամբ, զինված ուժերը կարող են ձեռք բերել մինչեւ 100 000 HoloLens ակնոց, որոնք նախկինում արդեն օգտագործվել են ԱՄՆ եւ Իսրայելի զինված ուժերի մարզումների համար, եւ որոնք ամերիկյան բանակն ակնկալում է օգտագործել ներկայի գործողությունների համար։
«Մենք մտահոգված ենք, որ Microsoft-ն աշխատում է ԱՄՆ զինվորականներին զենքի տեխնոլոգիա մատակարարելու ուղղությամբ՝ օգնելով երկրի կառավարությանը «մեծացնել մահացությունը» այն գործիքների օգնությամբ, որ մենք ենք ստեղծել։ Մենք սպառազինություններ մշակելու համաձայնություն չենք տվել եւ պահանջում ենք հաշվի առնել մեր կարծիքն այն մասին, թե ինչպես է օգտագործվում մեր աշխատանքը»,- ասվում է նամակում, որի տակ ստորագրել են Microsoft-ի 50 աշխատակիցներ։
Նամակի հեղինակները նաեւ կոչ են արել ընկերությանը հրապարակել փաստաթուղթ, որում հստակ նշվի Microsoft-ի արտադրանքի օգտագործման համար թույլատրելի տեսակները։ Բացի այդ, նրանք կոչ են արել ստեղծել անկախ հանձնաժողով, որը կզբաղվի ընկերության արտադրանքի օգտագործման էթիկայի հարցերով։