Պատրաստվում ենք պարգևատրումներ տալ՝ արդեն կոնկրետ գնահատականներ տալով աշխատակիցներին. Արարատի մարզպետ
Ամեն ինչ սկսվել էր դեռ շատ վաղուց, նախկինում էլ պարգևավճարներն ընդունված են եղել, և որքան էլ մենք փորձենք պայքարել կոռուպցիայի, կաշառակերության դեմ, եթե աշխատակազմը պատշաճ չվարձատրվի, ամեն մեկն իր տեղում, իր ստացած աշխատավարձի չափը թույլ չի տալու նրան զերծ մնալ գայթակղությունից՝ ինչ-որ նվերներ, կաշառք վերցնելով:
Այս մասին «Ազատություն» ռադիոկայանի եթերում նշեց Արարատի մարզպետ Գարիկ Սարգսյանը՝ խոսելով պարգևավճարների մասին: Նա նկատեց, որ իր այս խոսքերը վերաբերում են ընդհանրապես քաղծառայողների ցածր աշխատավարձերին, ոչ կոնկրետ մարզպետարանի կամ մարզպետների: Գարիկ Սարգսյանը, ով նախկինում Նոր Կյանք գյուղի ղեկավարն էր, նշեց, որ այդ ժամանակ էլ համայնքում եղել է աշխատավարձի և պարգևատրման ֆոնդ, ունեցել են խնայողություններ, և ինքը համայնքապետ եղած ժամանակ էլ պարգևատրել է համայնքապետարանի աշխատակիցներին այսպես ասած՝ «13-րդ աշխատավարձով»:
Ըստ Գարիկ Սարգսյանի՝ սա տարածված երևույթ է, և աշխատակիցները չէին հասկանա, եթե այդ պարգևատրումները չլինեին: «Չէինք կարող խուսափել դրանից, քանի որ մենք կլինեինք եղած համակարգում առաջինը, որ չենք պարգևատրել մեր աշխատակիցներին, ինչը մեր աշխատակիցներն ու քաղաքացիները դժվար թե հասկանային այս պարագայում, քանի որ դա ընդգրկում է հանրապետությունում շատ մեծ թվով մարդկանց, քանի որ պարգևատրվողները, նրանց հետ աշխատող այլ անձինք մեր հասարակության ինչ-որ զգալի զանգված են կազմում, և եթե դրանք չլինեին, միգուցե հենց նրանց մոտ մեծ դժգոհության ալիք կբարձրանար»,-ասաց նա:
Ինչ վերաբերում է կատարված աշխատանքներին, ապա Արարատի մարզպետը նշեց, որ առաջիկայում բիզնես-ֆորում են ունենալու մարզում, որին նաև արտերկրից են հյուրեր լինելու, ներկայացնելու են մարզի տեսլականը նաև նրանց համար, ովքեր ունեն բիզնես ծրագրեր, սակայն չգիտեն, թե որ ոլորտներում անեն ներդրումները:
Հարցին, թե մյուս տարի էլ են պարգևատրումներ անելու, Գարիկ Սարգսյանը պատասխանեց. «Այս տարի, մեր մարզպետարանի մասով ասեմ, 86 միլիոն դրամով ավելացված է պարգևատրման բյուջեն, պատրաստվում ենք պարգևատրումներ տալ, բայց արդեն կոնկրետ գնահատականներ տալով աշխատակիցներին, թե նրանք ինչ գնահատականի են արժանի իրենց կատարած աշխատանքով, ըստ այդմ նրանք պարգևատրման կարող են արժանանալ տարեկան ոչ թե մեկ անգամ, այլ նույնիսկ 3-4 անգամ»:
Հիշեցնենք, որ մարզպետը 2018թ. դեկտեմբերի 24-ի թիվ 312 կարգադրությամբ մարզպետարանում աշխատող 15 անձանց, այդ թվում՝ իրեն պարգևատրել էր 104.5% դրույքաչափով: Արարատի մարզպետի հիմնական աշխատավարձը 661,400 դրամ է: 104.5%-ի դեպքում պարգևատրման չափը կազմում է 691,163 դրամ: Տեղակալների հիմնական աշխատավարձը կազմում է 529,120 դրամ, պարգևատրվել է 552,930 դրամ և այլն: