на Русском
Տեսահոլովակի պրեմիերա. Արտեմ Վալտեր՝ «Զարմանա... 
«Լադանիվա» խմբի անդամներն այցելել են Ծիծեռնակ... 
Մշակույթի նախարարությունը պետության համար նույնքան կարևոր է, որքան Պաշտպանության նախարարությունը. Սամվել Կարապետյան
Հայաստանում Սփյուռքի ու Մշակույթի նախարարությունների լուծարման որոշումը կանխատեսելի չէր: Այս մասին հունվարի 22-ին լրագրողների հետ հանդիպմանը նշեց հուշարձանագետ Սամվել Կարապետյանը:
«Կանխատեսելի չէր, մեր կարգավիճակում էլի ազգեր կան, բայց էս աստիճանի ցրված երևի հրեաներն են, գնչուները, մի ազգ, որի մեկ քառորդն է մի տան մեջ ապրում, սփյուռքի … անունը կարևոր չէ, նախարարություն թող լինի, դրա կենսական պահանջը կար, այլ հարց է, որ այն անհրաժեշտ արդյունավետությամբ չէր աշխատում, պետք էր կարգի բերել, հզորացնել, անգամ պիտի բաժիններ ավելացվեին, որ աշխատանքն ավելի արդյունավետ լիներ, եթե մի կառույց այնքան էլ արդյունավետ չի աշխատում, պետք չէր վերացնել:
Նույն կերպ մտածում եմ Մշակույթի նախարարության մասին, որի հետ արդեն գործի բերումով ավելի մոտ եմ, համագործակցում ենք»,- ասաց նա:
Կարապետյանի կարծիքով` Մշակույթի նախարարությունը պետք է ունենար մի շարք բաժիններ: Նրա գնահատմամբ` Մշակույթի նախարարությունը պետության համար նույնքան կարևոր է, որքան Պաշտպանության նախարարությունը:
Նա մեջբերեց Ուինսթոն Չերչիլի խոսքը` «ինչի՞ համար ենք կռվում` մշակույթի»: Հուշարձանագետը կարծում է, որ մշակույթն անպաշտպան թողնել չի կարելի: Նա կարևորեց նախարարության կողմից հայկական հուշարձանների ոչնչացմանն արձագանքելը:
«Մենք երբեմն մտածում ենք` ով չգիտի, որ այդ հուշարձանները հայկական են, մենք այդ դաշտում բացակա ենք, իսկ դրա համար Մշակույթի նախարարությունը հայ մշակութային ժառանգության տերը պիտի լինի, գոնե մեր երկրի տարածքում պահպանված ժառանգության»,- ասաց նա` հավելելով, որ Մշակույթի նախարարությունը պետք է բաժիններ ունենա` ըստ երկրների, ինչպես ուներ Սփյուռքի նախարարությունը:
