Վրաստանում պայթյունի հետևանքով հիվանդանոց տեղափոխված երեխաներից մեկը մահացել է

Թբիլիսիի Դիդի (Մեծ) Դիղոմի թաղամասում գազի պայթյունի հետևանքով զոհերի
թիվը հասել է 4-ի: Իմեդի հիվանդանոց տեղափոխված 4 տարեկան փոքրիկը մահացավ: Այս մասին հայտնում է «Ալիք մեդիա»-ն:

Իմեդի կլինիկայի բժիշկը հաստատել է տեղեկությունը: Մասնագետներն ասել են, որ երեխան գանգուղեղային բազմաթից վնասվածքներ է ունեցել՝ կյանքի հետ անհամատեղելի: Մի քանի անգամ սրտի կանգ է արձանագրվել: Փոքրիկի անունն ու սեռը չի նշվում, ասվում է միայն, որ նա երկվորյակ եղբայր կամ քույր ունի, ով չի տուժել, այս պահին գտնվում է բժիշկների հսկողության տակ՝ Իաշվիլիի անվան  կլինիկայում: Ըստ չհաստատված տեղեկությունների՝ պայթյունի զոհ է դարձել նաև երեխաների մայրը:

Ընդհանուր առմամբ Իաշվիլի հիվանդանոցում այժմ պայթյունից տուժած 6 երեխա կա: Ըստ բժիշկների՝ նրանց մեծ մասը վաղը դուրս կգրվի, բոլորի վիճակը բավարար է:

Հիշեցնենք՝ ժամեր առաջ Թբիլիսիի ծայրամասային թաղամասում բնակելի շենքերից մեկի 6-րդ հարկում տեղի ունեցած գազի պայթյունի հետևանքով տեղում մահացել էր 3 բնակիչ: Նշվում էր, որ պատահարից տուժածների մեծամասնությունը երեխաներ են: