Տնտեսական աճը կլինի 5 տոկոսին մոտ, արտաքին պարտքը կավելանա 490 մլն դոլարով․ ՀՀ սոցիալ-տնտեսական ցուցանիշները 2018 թ.-ի վերջի դրությամբ

2018թ.-ի հունվար-նոյեմբեր ամիսների տվյալներով՝ ՀՀ տնտեսական աճը կազմել է 5.7%, իսկ ամբողջ տարվա կտրվածքով կանխատեսվում է, որ աճը կլինի 5 տոկոսին մոտ։ Հիշեցնենք, որ 2017-ին տնտեսական աճը կազմել է 7.5%։

Առանձին ոլորտներով վերցրած՝ 2018-ի հունվար-նոյեմբերին արդյունաբերական արտադրանքի ծավալն աճել է 4.1 տոկոսով, շինարարության ծավալը՝ 5.5 տոկոսով, ծառայությունների ծավալը՝ 18.4 տոկոսով։ Գյուղատնտեսության համախառն արտադրանքի ծավալը, սակայն, 8.1 տոկոսով անկում է գրանցել։ Իսկ գնաճը կազմել է 2.6 տոկոս:

Արտաքին առևտրաշրջանառությունը կազմել է 6 մլրդ 723 մլն դոլար՝ 19.1 տոկոս աճ գրանցելով, սակայն մեծապես ի հաշիվ ներմուծման։ Այս ընթացքում արտահանումն աճել է 9.8 տոկոսով կամ կազմել է 2 մլրդ 202 մլն դոլար, իսկ ներմուծումը՝ 24.2 տոկոսով կամ կազմել է 4 մլրդ 521 մլն դոլար:

2018թ․-ի առաջին կիսամյակում Հայաստանում կատարվել են 1 մլրդ 158․6 մլն դոլարի ներդրումներ, որը 2017 թ․-ի ցուցանիշից բարձր է 134․4 մլն դոլարով։ Ուղղակի ներդրումների գծով ստացումները հակառակը՝ նվազել են։ Ուղղակի ներդրումների ստացումներն անցյալ տարվա 6 ամիսներին եղել են 261․6 մլն դոլար, 2017 թ․-ի նույն ժամանակահատվածում ուղղակի ներդրումները կազմել էին 327․9 մլն դոլար՝ 66․3 մլն-ով ավելի։ Իսկ 2018թ. 3-րդ եռամսյակում օտարերկրյա ուղղակի ներդրումները կազմել են 125 մլն դոլար։

Ֆինանսների նախարարությունը հայտարարել է, որ 2019թ.-ին Հայաստանի արտաքին պարտքը կավելանա 490 մլն դոլարով։ Այսպիսով՝ պետական պարտքը հաջորդ տարեվերջին կհատի 3,3 տրիլիոն դրամը՝ հասնելով ՀՆԱ-ի 49.8%-ի։ Նոր վարկերից ամենամեծը նախատեսվում է ստանալ Ռուսաստանի Դաշնությունից՝ 343 մլն դոլարի չափով, երկրորդ տեղում Ասիական զարգացման բանկն է՝ 53.1 մլն դոլարով, ապա Վերակառուցման և զարգացման միջազգային բանկը՝ 50.4 մլն դոլարով։ Մնացածը 10 մլն դոլարը չգերազանցող վարկեր են, որոնք վերցվելու են տարբեր կազմակերպություններից և երկրներից։

Սոցիալական ցուցանիշները ոչ այնքան թարմ են, բայց պաշտոնական ամենավերջին տվյալներն են։ Ըստ Ազգային վիճակագրական ծառայության՝ գործազրկության մակարդակը 2018-ի 2-րդ եռամսյակի տվյալներով 20.2 տոկոս է։ Իսկ աղքատության մակարդակը՝ 25.7 տոկոս, ինչը նշանակում է, որ երկրի բնակչության ամեն չորրորդը ամսական 41 612 ՀՀ դրամ վերին աղքատության գծից ցածր է գտնվել:

Շիրակի մարզում գրանցվել է հանրապետության կտրվածքով ամենաբարձր աղքատության մակարդակը, որտեղ աղքատության գծից ցածր է բնակչության 44%-ը:

2017թ. վերջին կենսաթոշակառուների թվաքանակը կազմել է 458 194 մարդ, իսկ կենսաթոշակի նվազագույն չափը 16 000 դրամ է: Կառավարությունը խոստացել է հունվարի 1-ից նվազագույն կենսաթոշակը բարձրացնել 60 տոկոսով՝ դարձնելով 25.500 դրամ, որը կգերազանցի պարենային աղքատության շեմը:

2018 թվականի հունվարի 1-ից մինչև դեկտեմբերի 25-ը Հայաստանից մեկնածների և Հայաստան ժամանածների տարբերությունը կազմել է +20 հազար 713։ Այսինքն՝ Հայաստան ժամանածների թիվը 20 հազար 713-ով շատ է եղել մեկնածների թվից: 2017-ին մեկնածների թիվը 25 հազար 932-ով ավելի է եղել ժամանածների թվից։

2006 թվականից ի վեր առաջին անգամ Հայաստան ժամանողների և Հայաստանից հեռացածների տարբերությունը կրկին հասնում է 21 հազարի: Հիշեցնենք, որ ըստ պաշտոնական տվյալների՝ 1991-ի անկախությունից ի վեր միայն երեք տարի է եղել, երբ Հայաստան ժամանածների և Հայաստանից հեռացածների տարբերությունը հօգուտ ժամանողների է եղել: Այդ երեք տարիները 2004-2006 թվականներն են՝ երեք տարի անընդմեջ։