Բենզալցակայանների տուրքի բարձրացումը չի բերի որևէ բիզնեսի խաթարման. փոխքաղաքապետ

Տեղական տուրքերի և վճարների բարձրացումը չի բերի որևէ բիզնեսի խաթարման: Այս մասին, այսօր՝ դեկտեմբերի 21-ին, լարգրողների հետ զրույցում նշեց Երևանի փոխքաղաքապետ Հայկ Սարգսյանը՝ անդրադառնալով նրան, որ Երևան քաղաքի 2019-ի բյուջեով նախատեսվում է բարձրացնել տեղական տուրքերը և վճարները:

Մասնավորապես, ոչ հիմնական շենքերի և շինությունների շինթույլտվության համար տեղական տուրքը մոտ 40 տոկոսով է ավելացվել, իսկ վառելիքի լիցքավորման կայանները ներկայիս 350 հազար դրամի փոխարեն համայնքին տարեկան կվճարեն 600 հազար դրամ:

Այս առնչությամբ, Հայկ Սարգսյանը նշեց, որ պարզելու համար, թե այդ փոփոխությունն ինչ բեռ կարող է առաջացնել փոքր բիզնեսի վրա, իրենք վերցրել են որպես հաշվարկի բազա քաղաքում ամենափոքր, մեկ լցակետ ունեցող, տնտեսապես ամենավատ գոտում գտնվող բենզալցակայանի շրջանառության տվյալներ. «Միջին օրական վաճառքը նման բենզալցակայանում կազմում է 400-500 լիտր է: Պարզ թվաբանական հաշվարկով եթե ավելի 250 հազար դրամը բաժանում ենք օրական ծավալի վրա, դա 1.37 դրամ 1 լիտրի վրա բեռ է առաջացնում՝ 450, 430, 420 գնի պայմաններում»,- ասաց նա՝ հավելելով. «Մինչդեռ, փոքր և մեծ վառելիքի լիցքավորման կետերում տուրքերը ավելացել են նույն չափով. «Այո, այստեղ կա անհամաչափ բաշխում, բայց դա Երևան քաղաքի լիազորությունների տիրույթում չէ և այդ բաշխումն օրենքով է՝ միանման տուրք թե' փոքրի, թե՛ մեծի համար»:

Փոխքաղաքապետը վստահեցրեց, որ որևէ բենզալցակայան չի ունենա գնի այնպիսի տատանում, որը կբերի բիզնեսի խաթարմանը: Ըստ նրա՝ այն բեռը, որը ենթադրում է սահմանաչափերի բարձրացում, աննշան փոփոխություն է առաջացնելու բիզնեսների համար: